Sport24.az
"Mingəçevir"lə iki dəfə qarşılaşmışdıq. Səfərdə biz, evdə isə onlar qalib gəlmişdi. Turnir cədvəlində mövqeyimiz yaxındır". Bu sözləri Sport24.az-a açıqlamasında "Baku Sportinq"in baş məşqçisi Röyal Nəcəfov deyib.
Gənc mütəxəssis komandasının Birinci Liqanın 19-cu turunda "Mingəçevir"lə heç-heçə etdikləri oyunu şərh edib:
"Hər iki komanda üçün önəmli matç idi. İlk 15 dəqiqədə 2-3 qol epizodumuz oldu və həmin şanslardan birini dəyərləndirib önə keçdik. Bundan sonra oyun bərabərləşdi. Birinci hissə 1:1 hesabı ilə bitdi. Hesabda öndə olanda futbolçumuz qapıçı ilə təkbətək epizoddan yararlana bilmədi. Fərqi artırsaydıq, böyük hesabla qalib gələ bilərdik. Şans boşa verildi və bu da futbolçularda psixoloji gərginlik yaratdı. İkinci yarıda da yaxşı oynadıq. Qalib gəlməli idik. Təəssüflə qeyd edim ki, bu matçda 2 xal itirən komanda biz olduq. Növbəti turda "Səbail"lə oynayacayıq. Rəqibin gücü bəllidir, Premyer Liqadan gəlib. İki dəfə oynamışıq qalib müəyyənləşməyib. Hələ ki, vaxtımız var. Milli fasiləyə görə, futbolçulara istirahət vermişik. Bizi qarşıda 8 final matçı gözləyir".
Qeyd edək ki, "Baku Sportinq" - "Mingəçevir" matçı 1:1 hesabı ilə başa çatıb.
