Sport24.az
Azərbaycan Tələbə Futbol Federasiyası (ATFF) İctimai Birliyi İcraiyyə Komitəsinin növbəti iclası keçirilib. Sport24.az xəbər verir ki, bunu AFFA-nın mətbuat xidməti açıqlayıb.
Federasiyanın prezidenti Firudin Qurbanov tələbə futbolunun 2024-cü il mövsümünün yekunlarına dair çıxış edib, gündəlikdə duran əsas məsələlər barədə fikirlərini bildirib, 2021-2025-ci il İnkişaf Konsepsiyasının icrası ilə bağlı zəruri məsələlərə toxunub, tələbə futbolunda görülmüş işləri və həyata keçirilməsi vacib olan tədbirləri qeyd edib.
Qurbanov çıxışında qeyd edib ki, hesabat ilində Azərbaycan Tələbə Liqasının 2023/2024-cü illər mövsümünün qalibi Azərbaycan İdman Akademiyasının komandası Macarıstanın Debretsen şəhərində tələbələr arasında keçirilən 5-ci Avropa Universitet Oyunlarında 5-ci yeri tutub.
Ardından ATFF İctimai Birliyinin icraçı direktoru Elnur Abdullayev 2024-cü il ərzindəki fəaliyyət haqqında federasiyanın hesabatını təqdim edib, baş katib Lətif Novruzov Azərbaycan Tələbə Liqasının ötən ildəki fəaliyyətinin yekunu barədə məlumat verib.
Daha sonra İcraiyyə Komitəsinin üzvləri gündəlikdə duran cari məsələlər ətrafında geniş fikir mübadiləsi aparıblar. Azərbaycan Tələbə Liqasının cari vəziyyətindən, liqanın ölkədə tələbə futbolunun inkişafındakı əhəmiyyətindən danışılıb. Müzakirələr zamanı növbəti illər üçün tələbələr arasında keçiriləcək beynəlxalq yarışlara ali təhsil müəssisələrinin komandalarının iştirakının əhəmiyyəti diqqətə çatdırılıb.
Sonda tələbələrdən ibarət komandanın iyulda Xorvatiyanın paytaxtı Zaqrebdə keçiriləcək futzal üzrə tələbələr arasında Avropa çempionatında iştirakı üçün hazırlıq işlərinə başlanılması qərara alınıb.
