Ayxan Abbasov: “Hakim səhvləri bizə çox təsir edib”

"Xal qazanmaq istəyirdik. Bilirdik ki, rəqib "Qarabağ"dır, çətin olacaq. Birinci hissədə qol epizodlarını dəyərləndirə bilmədik".

İdman.biz xəbər verir ki, bunu "Turan Tovuz"un baş məşqçisi Ayxan Abbasov deyib.

Gənc mütəxəssis Azərbaycan Premyer Liqasının XXXV turunda "Qarabağ"a 3:4 hesablı məğlubiyyəti şərh edib: "İkinci hissəyə yaxşı başladıq, qollar vurduq. Məğlubiyyətə üzülürəm. Çox rahat qollar buraxdıq. Amma yaxşı qollar vurmuşuq. Ən çox qol vuran ikinci komandayıq. Son dörd tura kimi avrokubok həyəcanı yaşadıq. Gələn mövsüm bunu sona qədər çatdırmaq lazımdır".

Ayxan Abbasov son dəqiqələrdə "Qarabağ"ın vurduğu qol zamanı qayda pozuntusu olduğunu bildirib: "Məncə, yüz faiz qayda pozuntusudur. Hakimlikdən danışanda deyirlər ki, baş məşqçi bəhanə axtarır. Hakim dedi ki, VAR-da baxdıq, top Brlajdi Pusinin əlinə dəyib. Bundan başqa da bir neçə epizod oldu. Bir tərəfdən xoşdur ki, "Qarabağ"la oyunlarda belə sərt mübarizələrə imkan verirlər. Amma son dəqiqədə belə qol buraxmaq çətindir. İkinci dövrədə hakim səhvləri bizə çox təsir edib. Bu gün tam başqa olaylar ola bilərdi. Bunu da keçməliyik. Komandalara işləyirlər sözü ağır olar. Amma görünən odur ki, hakimlər bu il yükü daşıya bilmədilər. Hamıya aid deyil, yaxşı hakimlərimiz də var. Amma nəticəyə təsir edən səhvlər çox oldu. Onlar da inkişaf etməlidir. Eşitdiyimə görə, çempionatda komanda sayının atmamasının səbəblərindən biri də hakimlərin az olmasıdır. Bu mövqedə də iş getməlidir".

"Turan Tovuz"un baş məşqçisi heyətlə bağlı dəyişikliklərlə bağlı yekun qərar vermədikləri deyib: "Çalışacağıq ki, 4-5 transfer edək. Gedənlərlə bağlı yüz faiz qərar verməmişik. Son oyundan sonra fikirləşəcəm. Bir futbolçu var ki, bu gün yaxşı mənada fikrimi dəyişdi. Məşqçilikdə belə şeylər var".

Qeyd edək edək ki, "Turan Tovuz" 45 xalla 6-cı pillədə qərarlaşıb.

İdman.biz