Idman.biz
"Azərbaycan Hava Yolları" aviaşirkətinə məxsus, Bakı-Qroznı reysini yerinə yetirən Embraer 190 təyyarəsinin qəzaya uğramasından bir il ötür. Təyyarənin göyərtəsində 67 nəfər - 62 sərnişin və beş ekipaj üzvü olub. Aviaqəza nəticəsində 38 nəfər həlak olub, daha 29 nəfər xəsarət alıb.
Bu faciənin qurbanları arasında 13 yaşlı Məhəmmədəli Yeqanov da olub. Yeniyetmə Yeni ili qarşılamaq üçün anasının yanına - Qroznıya gedirdi.
Məhəmmədəli səkkizinci sinifdə oxuyurdu və Bakının "Gənclik" futbol klubunun heyətində çıxış edirdi.
Komandanın baş məşqçisi Vasif Rzayev İdman.Biz-ə açıqlamasında bildirib ki, oğlan 2023-cü ildə onun rəhbərliyi altında məşqlərə başlayıb.
"O, çox mehriban və həyatsevər uşaq idi - həmişə gülümsəyirdi, zarafat edirdi, hamı ilə asanlıqla ünsiyyət qururdu. Onun çoxlu dostu var idi, komanda onu çox sevirdi", - deyə Rzayev xatırlayır.
Məşqçinin sözlərinə görə, Məhəmmədəli Yeqanov yaxşı oxuyurdu və dərslərinə məsuliyyətlə yanaşırdı:
"O, təhsil və idmanı birləşdirə bilirdi. Çox vaxt məşqlərdən sonra repetitorlarla əlavə dərslərə tələsirdi. Çətin qrafikə baxmayaraq, Məhəmmədəli əla fiziki formada idi və qısa müddətdə futbolçu kimi nəzərəçarpacaq dərəcədə inkişaf etmişdi, oyunlarımızda iştirak edirdi".
Vasif Rzayev qeyd edib ki, faciədən bir il keçməsinə baxmayaraq, itkinin ağrısı səngiməyib:
"Onun üçün çox darıxırıq və tez-tez xatırlayırıq. Hələ də yanımızda çatışmır. Bizə qalan yeganə şey onun videolarına baxmaqdır".
Mustafa Daşdəmirov
