Sport24.az
"Hazırlığın birinci mərhələsini başa vurmuşuq. İlk mərhələdə mövsümü nisbətən erkən başa vuran klubların oyunçularını heyətə cəlb etmişdik". Sport24.az xəbər verir ki, bunu Azərbaycan millisinin məşqçisi Arif Əsədov deyib.
AFFA-nın mətbuat xidmətinə açıqlama verən mütəxəssis yığmanın təlim-məşq toplanışı və qarşıdakı beynəlxalq yoldaşlıq görüşlərinə hazırlıq barədə danışıb: "Əsasən fiziki çalışmalara önəm verdik. Dünəndən komanda tam heyətlə bir araya gəlib. Artıq qarşıdakı oyuna taktiki hazırlıq gedir. İyunun 2-də keçirilən Azərbaycan Kubokunun final oyununda milli komandanın 8 üzvü iştirak etmişdi. Həmin görüşdə meydana çıxanlar üçün dünən bərpa məşqi oldu. Bu gündən etibarən Albaniya ilə qarşılaşmaya tam heyətlə hazırlaşırıq".
Əsədov liqalarda mövsüm yeni başa çatdığından, futbolçuların yorğun olduqlarını bildirib: "Elə bir dönəmdir ki, oyunçuların durumunda disbalans var. Bəziləri zədədən yeni qayıdıb, bəziləri son matçlarını 15-20 gün əvvəl keçiriblər. Biz də qarşıdakı görüşlərdə bu durumu nəzərə alacağıq".
Baş məşqçi həm Albaniya, həm də Qazaxıstan önünə qələbə qazanmaq əzmi ilə çıxacaqlarını sözlərinə əlavə edib: "Albaniya komandası Avropa çempionatına vəsiqə qazanıb. Əsas heyətlərində daxili çempionatda oynayan futbolçu, demək olar ki, yoxdur. Futbolçuları İtaliya, İngiltərə və digər tanınmış futbol ölkələrinin klublarında çıxış edirlər. Bu da Albaniyanın güclü komanda olduğunu göstərir. Həmçinin, sonrakı rəqib Qazaxıstan da güclü kollektivdir. Onlar da Avropa çempionatına vəsiqə qazanmağa çox yaxın idilər. Bu baxımdan hər iki qarşılaşma bizim üçün yaxşı sınaq olacaq. Ancaq yenə də oyunlara qələbə üçün çıxacağıq. Yoldaşlıq görüşləri olduğundan, bütün futbolçulara şans verməyə çalışacağıq".
Qeyd edək ki, Azərbaycan milli komandası iyunun 7-də Bakı vaxtı ilə saat 21:00-da Albaniya ilə, 11-də isə saat 18:00-da Qazaxıstanla yoldaşlıq görüşündə qarşılaşacaq. Hər iki oyun Macarıstanın Sombatxey şəhərindəki "Haladas SportKomplexum"da keçiriləcək.
