Sport24.az
"Fasilədən sonra ilk oyunlar komandaların mövsümün ikinci yarısına necə hazırlaşdığını göstərəcəkdi. Yeni transferləri də izləmək maraqlı idi". Bu sözləri Sport24.az-a açıqlamasında millinin sabiq məşqçisi Arif Əsədov deyib.
Təcrübəli mütəxəssis 19-cü oyun həftəsi çərçivəsində baş tutan görüşlər barədə fikirlərini bölüşüb:
"Sürpriz nəticə "Kəpəz" - "Turan Tovuz" oyununda oldu. Hesabın böyük bəlkə də bir çoxları üçün gözlənilməz idi. Bu oyunadək "Turan Tovuz" bu qədər qol görməmişdi. Nominal qonaqlar matça ciddi itkilərlə çıxmışdı. Ancaq bu heç də "Kəpəz"in qələbəsinə kölgə salmır.
"Səbail" xeyli vaxt idi ki, "Sumqayıt" üzərində qələbə qazana bilmirdi. Şənbə günü "dənizçilər" həm yaxşı oynadılar, həm də layiqli 3 xal qazandılar. "Sumqayıt" bu matçda zəif təsir bağışladı. Həm "Zirə", həm də "Araz Naxçıvan" yüksək yerlər uğrunda mübarizə aparırlar. 6 xallıq oyun idi. "Zirə"yə mütləq qələbə lazım idi ki, avrokubok zonasından uzaqlaşmasın. Qələbəyə layiq idilər. "Araz Naxçıvan" zəif çıxış etdi.
Əsədovun turun digər oyunları barədə fikirləri isə belə olub:
"Qarabağ" - "Şamaxı" oyununda favorit Ağdam təmsilçisi idi. Amma "Şamaxı" da layiqli mübarizə apardı. "Neftçi" - "Sabah" görüşündə hər iki komandaya 3 xal vacib idi. "Sabah" qalib gəlib lider qrupuna yaxınlaşmaq istəyirdi. Nəticə elə oldu ki, hər iki komanda 2 xal itirdi".
Qeyd edək ki, Misli Premyer Liqasında XIX tura yekun vurulub. Lider "Qarabağ" növbəti qələbəsini qazandı, "Turan Tovuz" isə gözlənilmədən "Kəpəz"ə məğlub oldu. "Səbail" Cavid Hüseynovun rəhbərliyi altında ilk qələbəsini əldə etdi. "Neftçi" "Sabah"la heç-heçəyə razılaşdı, "Zirə" isə "Araz-Naxçıvan"ı minimal hesabla üstələyib.
