Sport24.az
"Əsas odur ki, qalib gəldik. Üzərimizdə daha çox işləməliyik. Təlim-məşq toplanışı qələbə ilə başa vurduq ki, vacib olan da budur. Bəli, razıyam ki, super oynamaqdıq. Buna baxmayaraq, qələbə qazandıq". Bu sözləri millinin üzvü Aleksey İsayev Sport24.az-ın Macarıstana ezam olunmuş əməkdaşına açıqlamasında bildirib.
İsayev mövsümün sonu olduğu üçün futbolçuların bir qədər yorğun olduğunu da vurğulayıb:
"Hamımız insanıq, istər-İstəməz mövsümün yorğunluğu hiss olunur. Mənim istirahət üçün cəmi 3 günüm olacaq. Ondan sonra "Sabah"ın təlim-məşq toplanışına qoşulacam".
Yarımmüdafiəçi millinin Malta və San Marino ilə qarşılaşmalarını da müqayisə edib:
"Deməzdim ki, Malta qeyri-adi oyunla bizi məğlub etdi. Onlar cəmi iki əks-hücumu oldu ki, bundan da maksimum istifadə etdilər. Biz isə əksinə, çox sayda qol epizodlarından istifadə edə bilmədik. San Marino ilə görüşdə isə matçın taleyini ilk yarıda həll etmək olardı. Sadəcə, bitiricilik çatmadı ki, bunun üzərində işləməliyik. Futbolda hər gün öyrənmək və inkişaf etmək lazımdır. Fikrimcə, milli komandanın potensialı daha artığına imkan verir".
Qeyd edək ki, Ayxan Abbasovun rəhbərlik etdiyi milli Avstriyada təşkil olunan təlim-məşq toplanışı çərçivəsində 2 yoxlama görüşü keçirib. Maltaya (0:2) yenilən yığma, San Marinonu (2:1) məğlub edib.
