Idman.biz
Afrika Futbol Konfederasiyası qalmaqallı Afrika Millətlər Kuboku (CAF) finalından sonra Seneqal və Mərakeş yığmaları ilə bağlı intizam qərarlarını açıqlayıb.
İdman.Biz xəbər verir ki, ən sərt cəzalar Seneqal tərəfinə tətbiq olunub.
Yığmanın baş məşqçisi Pap Tiyav qeyri-idman davranışı və futbolu nüfuzdan salmaq ittihamı ilə CAF turnirlərində beş oyunluq diskvalifikasiya edilib. Mütəxəssis eyni zamanda 100 min dollar (170 min AZN) məbləğində cərimələnib. Qeyd edək ki, Tiyav komandası ilə birlikdə meydanı tərk etmişdi.
Seneqal millisinin futbolçuları İliman Ndiaye və İsmaila Sarr hakimə qarşı qeyri-idman davranışına görə CAF yarışlarında 2 oyunluq diskvalifikasiya olunublar. Bundan əlavə, Seneqal Futbol Federasiyası azarkeşlərin polisə qarşı aqressiv davranışına görə 300 min dollar (510 min AZN), futbolçular və məşqçilər heyətinin meydanı tərk etməsinə görə isə əlavə 300 min dollar (510 min AZN) cərimə alıb.
Mərakeş tərəfi də cəzasız qalmayıb. Əşrəf Hakimi CAF turnirlərində iki oyunluq diskvalifikasiya edilib, həmin cəzalardan biri şərti xarakter daşıyır. İsmail Saybari isə rəqib qapıçıya dəsmalın ötürülməsinə mane olduğu üçün üç oyunluq diskvalifikasiya ilə yanaşı 100 min dollar (170 min AZN) cərimələnib.
Mərakeş Futbol Federasiyasına da bir neçə maddə üzrə maliyyə sanksiyası tətbiq olunub. Bolboyların davranışına görə federasiya 200 min dollar (340 min AZN), VAR baxış zonasına daxil olan oyunçu və məşqçilərə görə 100 min dollar (170 min AZN), azarkeşlərin lazerlərdən istifadəsinə görə isə 15 min dollar (25 500 AZN) cərimə ödəyəcək.
