Adil Şükürov: "FCSB-nin bu cür gedişata hazır olduğunu gördük"

"Qarabağ" - FCSB oyunu fikirləşdiyim kimi, bol qollu və dinamik alındı. "Qarabağ" bu tip komandalara qarşı həmişə gözəl futbol sərgiləyib. Bu oyunda təmsilçimizin üstün oyununun şahidi olduq". 

Bu sözləri Sport24.az-a açıqlamasında Adil Şükürov deyib.

Təcrübəli mütəxəssis ötən gün Bakıda keçirilmiş "Qarabağ" - FCSB matçı haqqında fikirlərini bölüşüb.

"Həmişəki kimi Qurban Qurbanovun komandası üçüncü zonada aktiv pressinq edərək, FCSB müdafiəsini səhv etməyə məcbur edirdi. Lakin biz FCSB komandasının bu cür gedişata hazır olduğunu gördük. Oyun ərzində FCSB komandası maksimum 4-5 oyunçuyla hücuma çıxsa da, müdafiədə kompaktlığı saxlayırdı. Lakin buna baxmayaraq oyunun ikinci dəqiqəsində FCSB müdafiəsini Leandro Andradenin şəxsi keyfiyyəti hesabına keçərək vurduğu qol rəqibin müdafiəsində olan boşluğu göstərdi. Çox təəssüf ki, "Qarabağ"da standart vəziyyətlərdə olan boşluqdan FCSB komandası maksimum yararlanaraq ümumi nəticə olaraq Bakıdan üstün ayrıldı.  "Qarabağ" əvvəlki matçlarda olduğu kimi yenə də fürsətlərdən yararlana bilməməsi sonda play-off şansının tam olaraq üstündən xətt çəkdi. "Qarabağ"ın bu ilki Avropa Liqası oyunlarında keçirdiyi gözəl oyunlarına baxsaq, fikirləşmək olardı ki, komanda bu il yeni formatda keçirilən oyunlar da qrup mərhələsinə kimi yüksələcək. Amma qol fürsətlərini boşa verilməsi bu gün "Qarabağ"ın avrokuboklardan qıraqda qalmasına səbəb oldu".

Qeyd edək ki, görüş Rumıniya klununun 3:2 hesablı qələbəsilə başa çatıb.