Sport24.az
Bu gün Futbolun İnkişaf Fondunun UEFA-nın Uşaq Fondu ilə birgə əməkdaşlığı çərçivəsində "Qarabağ" - FCSB oyunundan öncə minadan zərəçəkmiş Ağdam rayonunun Əfətli kənd sakini 10 yaşlı Hüseyn Hüseynzadə baş hakimlə birgə meydana çıxacaq. Sport24.az xəbər verir ki, Avropa Liqasının Liqa mərhələsinin 7-ci turunda baş tutacaq oyunda iştirak edək yeniyetmə 6 yaşındaykən atası ilə birgə minalı əraziyə düşüb.
Köməyə gələn ailə üzvləri və atası həlak olub, əmisi isə xəsarət alıb. Ağdam təmsilçisinin futbolçularını isə meydana çıxarkən onları şəhid övladları müşayiət edəcəklər. Bu məsələdə "Qarabağ"a "Zəfər" təşkilatı dəstək göstərib.
Qeyd edək ki, Futbolun İnkişaf Fondunun təşkilatçılığı, ANAMA, Birləşmiş Millətlər Təşkilatının (BMT) Uşaq Fondunun (UNICEF) və Beynəlxalq Qırmızı Xaç Komitəsinin dəstəyi ilə futbolun təsir gücündən istifadə edərək əhalinin məlumatlandırılması məqsədilə həyata keçirilən "Mina və Partlamamış Hərbi Sursatların Təhlükəsinə dair Məlumatlandırma" layihəsi çərçivəsində 2022-ci ildən bu günədək Tovuz, Goranboy və Tərtər rayonlarının 8 kəndində tərəfdaşlarla birgə 1300-dən çox uşaq və 400-ə yaxın böyüyə təlim keçirilib.
