Idman.biz
Azərbaycanlı pilot Davin Cəfərov Portuqaliyada keçirilən kartinq üzrə açıq çempionatda iştirak edib.
İdman.biz xəbər verir ki, 3 ölkədən 22 pilot Palmela beynəlxalq trekində X30 kateqoriyasında birincilik uğrunda yarışıb.
Davin ilk mərhələdə qəza ilə üzləşib. Yarımfinalda 80 km/saatla hərəkət edərkən arxadan gələn digər pilot vaxtında əyləcdən istifadə etmədiyinə görə təmsilçimizin idarə etdiyi kartın arxa təkərinə toxunub. Yarışda müvəqqəti fasilə yaranıb.
Xəstəxanaya aparılan Davin Cəfərovda heç bir sınıq və baş zədəsi aşkar olunmadığından idmançının istəyi və həkimlərin razılığı ilə final mərhələsində iştirakına icazə verilib.
Davin final mərhələsinə 17-ci sıradan başlamasına baxmayaraq yekun sıralamada 9-cu olmağı bacarıb. Final mərhələsinə ağrıkəsici qəbul edərək qatılan idmançımıza əzmkarlığına və 8 təcrübəli rəqibini geridə qoyduğuna görə "Birelart" komandasının Portuqaliya üzrə direktoru Nuno İqnasio tərəfindən "sürətli pilot" medalı təqdim olunub. 16 yaşını sentyabrda qeyd edəcək təmsilçimiz daha öncə EK125 CC kateqoriyası üzrə Portuqaliya kubokunun qalibi olub.
Qeyd edək ki, beynəlxalq dərəcəli peşəkar kartinq pilotu olan Davin Portuqaliyada "Birel Art" komandasının şərəfini qoruyur. "Birel" Lyuis Hemilton, Niko Rosberq kimi Formula 1 ulduzlarını kəşf edib.
İdman.biz
