Arzu Hüseynova: "Formula-1" Bakıya turist axını və iqtisadi canlanma gətirir - MÜSAHİBƏ

Bakı Şəhər Halqası (BŞH) Əməliyyat Şirkətinin milli mətbuat katibi Arzu Hüseynovanın Oxu.Az-a müsahibəsi

- "Formula-1" Azərbaycana nə qazandırır?

- Yarış günlərində minlərlə turist Bakıya gəlir ki, bu da hotel, restoran, nəqliyyat və digər xidmət sahələrində iqtisadi canlanma yaradır. Məsələn, ötən il bilet alan tamaşaçıların 77%-i xarici turist olub. Artan maraq səbəbi ilə bu il iki yeni tribuna əlavə edilib və beləliklə ümumi tribuna sayı 12-yə çatdırılıb. Onlardan 9-na biletlər artıq tam satılıb. Bununla yanaşı, könüllü proqramları vasitəsilə yüzlərlə gənc beynəlxalq təcrübə qazanır, bu da onların sosial və peşəkar inkişafı baxımından çox önəmlidir.

- Hansı ölkələrdən daha çox azarkeş gəlir?

- Ən çox tamaşaçı Avropa ölkələrindən gəlir - xüsusilə Böyük Britaniya, Almaniya, İtaliya, Fransa, İspaniya və Niderlanddan. Bununla yanaşı, qonşu ölkələrdən - Türkiyə və Gürcüstandan, eləcə də Yaxın Şərqdən də çox sayda azarkeş yarışları izləmək üçün Bakıya səfər edir. Bu il maraqlı fakt ondan ibarətdir ki, ilk bilet Avstriyadan alınıb. Ümumilikdə isə artıq 100-dən çox xarici ölkəyə bilet satılıb ki, bu da yarışın qlobal miqyasda necə böyük diqqət topladığını göstərir.

- Ətraf mühitə təsir necə azaldılır?

- "Formula-1"in əsas hədəflərindən biri davamlılıq və ətraf mühitə təsirin minimuma endirilməsidir. Biz də Azərbaycan Qran-prisində bu istiqamətdə fəal işlər görürük. Paddok ərazisində birdəfəlik plastiklərdən imtina edərək onları tam bioloji parçalanabilən alternativlərlə əvəz etmişik. Bütün tədbir lanyardları 100% təkrar emal olunan materiallardan hazırlanır. Plastik tullantıların qarşısını almaq üçün bulvar boyunca iki sudoldurma stansiyası quraşdırılıb və tamaşaçılara özləri ilə termos və ya təkrar istifadə ediləbilən fincan gətirmək imkanı yaradılıb. Bundan başqa, "Green Post" marşalları təşəbbüsü çərçivəsində könüllülərimizin geyim və avadanlıqları təkrar emal materiallarından hazırlanır. Bu layihələr həm beynəlxalq davamlılıq hədəflərinə uyğunluğumuzu, həm də yerli səviyyədə ətraf mühitə məsuliyyətli yanaşmamızı nümayiş etdirir.

İdman.biz