Report.az
Azərbaycanın MMA döyüşçüsü Fərman Həsənov Mütləq Döyüş Çempionatındakı (UFC) rəqibinə beşinci məğlubiyyəti yaşadacaq.
"Report"un məlumatına görə, azərbaycanlı idmançı bu barədə bu il keçiriləcək "UFC Fight Night Baku" turniri ilə bağlı təşkil olunan mətbuat konfransında bildirib.
Onun sözlərinə görə, hazırlıqlar yaxşı gedir:
"Hazırda ABŞ-dəyəm. Döyüşdən üç həftə əvvəl Bakıya gələcəyəm. Hər şey qaydasındadır. UFC-də çıxış edəcəyimi gözləyirdim. Buna hazır idim. Məqsədimiz Azərbaycan bayrağını dalğalandırmaq və ölkəmizi layiqincə təmsil etməkdir. Rəqibimə UFC-də beşinci məğlubiyyəti yaşadacağam".
O, çəkisalma prosesi barədə danışıb:
"6-8 həftə dietamız davam edir. Ardınca daha da sərtləşir. Uzun illərdir bu idmandayıq. Daha əvvəl də bu prosesləri görmüşük. Bu döyüşdə də çəki salacağıq və problem olmayacaq".
F.Həsənov Azərbaycanın digər MMA döyüşçüsü Tofiq Musayevlə daim ünsiyyətdə olduğunu sözlərinə əlavə edib:
"Hər kəs komanda olaraq öz tövsiyələrini verir. Hazırkı rəqibim daha çox boksa üstünlük verir. Azərbaycanın isə güləşi daha çox məşhurdur. Bundan istifafə edib qalib gəlməyə çalışacağam. Həmyerlilərimiz bizə dəstək olurlar. Onlara təşəkkür edirəm. UFC turnirinin Bakıda olması böyük hadisədir. MMA-ya başlayanda məqsədim UFC-də çıxış etmək idi. Amma debütümün məhz Bakıda olacağını gözləmirdim".
Qeyd edək ki, "UFC Fight Night Baku" turniri iyunun 27-də Milli Gimnastika Arenasında təşkil olunacaq. Fərman Həsənov yarımağır çəkidə ABŞ təmsilçisi Erik Nolanla üz-üzə gələcək.
