Report.az
Olimpiya medalının belə keyfiyyətsiz çıxacağını gözləmirdim.
Bunu "Report"a açıqlamasında Fransanın paytaxtı Parisdə keçirilmiş Yay Olimpiya Oyunlarında gümüş medal əldə edən Azərbaycan boksçusu Alfonso Dominqes (92 kq) deyib.
O, da digərləri kimi turnirdə verilən medalın keyfiyyətindən şikayətçi olduğunu bildirib:
"Çünki son 2 ayda medalın keyfiyyətinin itməyə başladığını hiss etdim. Rəngi solurdu. Çox keyfiyyətsiz medaldır. Digər idmançılar da bununla üzləşib. Mümkündürsə, geri qaytarılmasını istəyirəm".
Qeyd edək ki, Azərbaycan idmançıları Paris olimpiadasında 7 medal qazanıblar. Cüdoçular Hidayət Heydərov (73 kq) və Zelim Kotsoyev (100 kq) fəxri kürsünün ən yüksək pilləsinə qalxıblar. Alfonso Dominqeslə yanaşı, taekvondoçu Qaşım Maqomedov (58 kq) yalnız finalda uduzaraq gümüş medal əldə ediblər. Yunan-Roma güləşçilərindən Həsrət Cəfərov (67 kq), sərbəst güləşçilərdən isə Giorgi Meşvildişvili (125 kq) ilə Maqomedxan Maqomedov (97 kq) bürünc mükafata sahib çıxıblar.
H.Heydərov və M.Maqomedovdan başqa, digər beşinin mükafatı keyfiyyətini itirib.
