İdman.biz
Kanadada yaşayan fiqurlu konkisürmə üzrə Azərbaycan millisinin üzvü Nərgiz Süleymanova AZƏRTAC-ın suallarını cavablandırıb.
İdman.biz həmin müsahibəni təqdim edir:
- Əvvəlcə özünüz haqqında ətraflı məlumat verərdiniz...
- Mən 2004-cü il sentyabrın 6-da Almaniyanın Mülhauzen şəhərində anadan olmuşam. Hazırda peşəkar şəkildə fiqurlu konkisürmə ilə məşğul oluram.
- Bu idman növü ilə məşğul olmağa sizi kim və ya nə ilhamlandırdı?
- Uşaq ikən ani bir anda bu idman növü ilə məşğul olmaq arzusuna düşdüm. Anamla birlikdə çox vaxt televiziyada konkisürmə yarışlarına baxırdıq. Anama konki sürməyi öyrənmək istədiyimi dedim. Ertəsi gün məni Kölndəki idman klubuna yazdırdı.
- Peşəkar karyeranıza 2010-cu ildə başlamış və 2021-ci ilə qədər Almaniyanın bayrağı altında beynəlxalq turnirlərdə iştirak etmisiniz. Lakin daha sonra yarışlara 3 illik fasilə verərək Kanadaya köçmüsünüz. Bu fasilənin səbəbi nə idi və həmin ərəfədə nə ilə məşğul olmusunuz?
- 3 illik fasilə verməyimin səbəbi ondan ibarət idi ki, ürəyim hər zaman Azərbaycan bayrağı altında çıxış etməklə döyünürdü. Azərbaycan millisinə keçmək üçün isə Beynəlxalq Konkisürmə İttifaqının (ISU) qaydalarına əsasən 2 il heç bir yarışda iştirak etməməli idim. Buna görə də Azərbaycan Qış İdman Növləri Federasiyasına mənə dəstək olduqları və arzumu reallaşdırmağımda kömək etdikləri üçün çox təşəkkür edirəm. Kanadaya isə məşqçilərim orada olduqları üçün köçmüşdüm. Onların məşq keçdikləri klubda hazırlaşmaq üçün daha yüksək imkanlar var idi.
- İki il ümumiyyətlə konki sürməmisiniz. Karyeranızı yenidən bərpa etməyə necə qərar verdiniz?
- Bəli, 2 il tamamilə konkidən uzaq qaldım. Çünki gimnaziyada oxuyurdum. Oranı da yüksək balla bitirdim. Amma boş vaxtlarımda məşq etməyi unutmurdum.
- Uzun fasilədən sonra buz meydançasına çıxanda hansı çətinliklərlə üzləşdiniz?
- Əlbəttə ki, uzun fasilədən sonra buz meydançasının üzərinə çıxmaq bir qədər çətin olur. Amma buna baxmayaraq, hazırda daha həvəslə məşq edirəm. Çünki artıq doğma Azərbaycanı təmsil edirəm.
- Almaniyada yaşamağınıza baxmayaraq, Bakıya gəlib Azərbaycan yığmasının şərəfini qorumaq istəmisiniz və uzun illər böyük səy göstərərək nəhayət millinin bir üzvü olmağı bacarmısınız. Beynəlxalq yarışlarda Azərbaycanı təmsil etmək istəyinizin bu qədər güclü olmasının səbəbi nə idi?
- Bəli, Azərbaycan yığmasının tərkibində çıxış etmək üçün uzun illər səy göstərmişəm. Bunun da səbəbi Vətənə olan dərin sevgimdir.
- Azərbaycanı ilk dəfə noyabrın 20-24-də Polşanın Varşava şəhərində keçirilmiş beynəlxalq turnirdə təmsil etdiniz. Qısa və sərbəst proqram üzrə 26 idmançı arasında 135.15 xal toplayaraq yekun nəticədə 16-cı oldunuz. Azərbaycan bayrağı altında çıxış etdiyiniz ilk yarış barədə təəssüratlarınızı bilmək maraqlı olardı...
- Bu, mənim Azərbaycan millisinin heyətində çıxış etdiyim ilk yarış olduğu üçün, sözsüz ki, həyəcanlı idim. Lakin özümü toparlamağa və layiqli nəticə əldə etməyə çalışırdım.
- Azərbaycanda bu idman növünün gələcəyini necə görürsünüz?
- Bu idman növünün Azərbaycandakı gələcəyini yüksək və parlaq görürəm. Qış İdman Növləri Federasiyası da fiqurlu konkisürmənin inkişafı üçün çox çalışır.
- Konki sürəndə ən çox nədən və ya nələrdən zövq alırsınız?
- Ümumiyyətlə, konki sürməkdən çox zövq alıram. Sanki bu idman növü mənim bütün həyatımdır. Hətta uşaq vaxtı məşqlərimi bitirdikdən sonra belə məni buz meydandaçasından çıxara bilmirdilər.
- Yarış zamanı stres və həyəcanınızı boğmaq üçün xüsusi bir strategiyanız varmı?
- Heç nəyi fikirləşməməyə çalışıram. Yalnız öz performansıma fokuslanıram. Buzun üzərində olarkən, sadəcə düşünürəm ki, azarkeşlərə gözəl bir rəqs bəxş edim.
- 13 yaşınız olanda tanınmış almaniyalı konkisürən Katarina Vittlə müqayisə edilmisiniz. Həmin vaxt bunu eşidəndə hansı hissləri keçirmişdiniz?
- Almaniyada yaşadığım üçün uşaqlıqdan Katarina Vitt kimi ulduz olmaq istəyirdim. Bəli, məni onunla müqayisə edirdilər. Hətta bununla bağlı qısa bir film də çəkmişdilər.
- Fiqurlu konkisürmədə özünü sınamaq istəyənlərə nə məsləhət görərdiniz?
- Mən onlara demək istəyirəm ki, əgər kiminsə konki sürməyə həvəsi varsa, qorxmasın, özünü bu sahədə sınasın. Əminəm ki, onlar bundan həzz alacaqlar.
- Hazırda sizi hansı yarışlar gözləyir və gələcək üçün əsas hədəfləriniz nələrdir?
- Hazırda məni Xorvatiyanın paytaxtı Zaqrebdə keçiriləcək beynəlxalq yarış gözləyir. Burada daha yüksək nəticə göstərməyə çalışacağam. Qarşıma qoyduğum hədəflərim öncə Avropa çempionatı, daha sonra dünya çempionatı və nəhayət Olimpiya Oyunlarıdır. Əlimdən gələni edəcəyəm ki, Azərbaycan bayrağını daim yüksəklərə ucaldım.
İdman.biz
