Badminton üzrə dünya çempionatında Edi Reski Dviçayodan qələbə ilə start

Fransanın paytaxtı Paris şəhərində badminton üzrə dünya çempionatına start verilib.

İdman.biz xəbər verir ki, ölkəmizin ilk dəfə mundialda baş məşqçi Morteza Validarvinin rəhbərliyi altında 4 kateqoriyada 6 idmançı ilə təmsil olunub.

Tokio və Paris olimpiadasının iştirakçısı, bamdinton üzrə milli komandamızın lideri Edi Reski Dviçayo dünya çempionatına qələbə ilə başlayıb. Edi kişi badmintonçuların şəxsi yarışında dünya reytinq sıralamasında 19-cu olan Yaponiya bamdintonçusu Koki Vatanabeni məğlub edib – 2:0 (21:19, 21:18). Badmintonçumuz 1/16 finalda İndoneziya təmsilçisi Conatan Kristie ilə qarşılaşacaq.

Digər badmintonçumuz Diki Pangestu isə kişi badmintonçuların şəxsi yarışında Xorvatiya badmintonçusu Aria Dinataya 1:2 (16:21, 21:16, 14:21) hesabı ilə uduzub.

Kişilərin qoşa yarışında Aqil Qəbilov-Diki Pangestu tandemi ilk görüşdə Sinqapur idmançıları Junsuke Kubo-Vesley Koh cütünə 0:2 (9:21,13:21) hesabı ilə məğlub olub.

Qadınların şəxsi yarışında Keişa Fatimə Zəhra 1/32 finalda braziliyalı Juliana Vieyra ilə qarşılaşacaq.

Qarışıq qoşa kateqoriyasında Cahid Əlhəsənov-Həcər Nuriyeva tandemi 1/32 finalda Almaniya badmintonçuları Malik Bourakkadi-Leona Mixalski cütü ilə üz-üzə gələcək.

Qeyd edək ki, dünya çempionatında Azərbaycan nümayəndə heyətini baş katib Ramil Hacıyev təmsil edir.

İdman.biz