Avqustda Qırğızıstanda Zəfər Zirvəsində beş alpinist həlak oldu: təfərrüatlar və faciələr

Avqustda Qırğızıstanda yerləşən Zəfər Zirvəsində ən azı beş alpinist həyatını itirib. Sport24.az SHOT adlı Telegram kanalına istinadən xəbər verir ki, ölümcül dağ iki rusiyalı, iki iranlı və bir italyan alpinistin həyatına son qoyub.

İlk olaraq Rusiya alpinizm yığmasının kapitanı, 66 yaşlı Nikolay Totmyanin ölüb. O, zirvəyə avqustun 10-da qalxıb, lakin ertəsi gün xəstəxanada infarktdan vəfat edib.

Avqustun 12-də isə iranlı cütlük – Məryəm Pilehvari və Həsən Məşhədioğlu həlak olub. Onlar zirvəyə qalxıb və eniş zamanı yüksəlişdə olan Natalya Naqovitsına ilə qarşılaşıblar. Bir neçə saat sonra iranlılar ölüb, rusiyalı alpinist isə ayağını sındıraraq dağ belində ilişib qalıb.

Natalya rusiyalı Roman, alman Günter və italyan Luka ilə birlikdə dağa çıxırmış. Luka sonda zirvəyə qalxmaqdan imtina edib və mağarada qrupu gözləyib. Günter təkbaşına zirvəyə çıxıb və sonra Lukanın yanına qayıdıb. Daha sonra onlara yalnız Roman qoşulub.

Avqustun 13-də Luka və Günter Natalyanın yanına qalxaraq ona çadır, yuxu tulumu, qaz və ərzaq aparıblar. Roman təkbaşına aşağı düşərək baza düşərgəyə qayıdıb. Lakin əcnəbilər Natalyanı endirə bilməyiblər və onunla birgə dağda gecələməli olublar. Hava şəraiti tamamilə pisləşib. Avqustun 14-də Luka və Günter də Natalyanı orada qoyaraq aşağı düşməyə məcbur olublar. Luka ağır donvurma alıb və ertəsi gün beyin qanamasından vəfat edib.

Qeyd olunmalıdır ki, həlak olan Luka Sinigaliya 2021-ci ildə Natalya Naqovitsına ilə birlikdə Xan-Tenqri zirvəsinə qalxıb. Həmin zaman Natalyanın həyat yoldaşı həlak olmuşdu. Natalya və Sergey italyan alpinistə zirvəyə qalxmaqda yardım etmişdi. Sonradan 6900 metr yüksəklikdə Sergey insult keçirmiş, gecə sayıqlayaraq özünü sığortalayan ipləri açmış və dərinliyə düşərək ölmüşdü. Luka isə bu yardımı unutmamış, Natalyanı xilas etməyə çalışmış, lakin özü də həyatını itirmişdi.

Hazırda təhlükəli hava şəraiti səbəbilə dörd alpinistin cəsədinin götürülməsi planlaşdırılmır. Üstəlik, hazırda yalnız rusiyalı qadının və italyan alpinistin yeri məlumdur. İranlıların isə dronla axtarışları nəticə verməyib.