Idman.biz
Bu ilin sentyabrında karyerasını başa vurduğunu açıqlayan, daha sonra isə böyük idmana qayıtmaq qərarı verən Yunan-roma güləşi üzrə tanınmış azərbaycanlı idmançı, dördqat dünya çempionu Eldəniz Əzizli yeni ilin ilk günlərindən etibarən aktiv məşqlərə başlayacaq.
Bu barədə İdman.Biz-ə açıqlamasında titullu azərbaycanlı özü məlumat verib.
Eldəniz Əzizlinin sözlərinə görə, sentyabrda keçirilən dünya çempionatından sonra karyerasını bitirmək qərarını emosional vəziyyətdə qəbul edib.
"Zaqrebdə keçirilən dünya çempionatından sonra, burada üçüncü yeri tutduğum və beşinci dəfə dünya çempionu ola bilmədiyim üçün idmandan getmək qərarı verdim. Bu mənim üçün çox ağır oldu və emosiyalarla verilmiş bir qərar idi. Zaman keçdikcə başa düşdüm ki, güləşsiz yaşaya bilmirəm. Üstəlik, beşqat dünya çempionu olmaq hədəfi ona çatmayana qədər mənə rahatlıq vermir (gülür). Məhz buna görə də qarşıdan gələn ilin ilk günlərindən aktiv məşqlərə başlamaq qərarına gəldim. Karyeram boyunca hər zaman maksimum səviyyədə çıxış etməyə çalışmışam və onu da məhz belə başa vurmaq istəyirəm. Ümid edirəm ki, yeni ildə buna nail olacağam", - deyə Eldəniz Əzizli bildirib.
