Sport24.az
"Neftçi" bu mövsüm zəif çıxış etdi. Amma komandanın avrokuboklardan kənarda qalacağını heç gözləmirdim. Düşünürdüm ki, ən azı ilk "üçlük"də yer alacaqlar. Paytaxt klubunun geridə qalan mövsümdə bərbad oyununun bir adı var: fiasko". Bu sözləri Sport24.az-a açıqlamasında Yunis Hüseynov deyib.
Mütəxəssis klubda işlərin düz getmədiyini, istər məşqçi, istərsə də futbolçu seçimində səhvə yol verildiyini də vurğulayıb: "Adrian Mutunun "sükan arxasına" dəvət olunması səhv addım idi. Ulduz futbolçu olmaq o demək deyil ki, məşqçi kimi də ümidləri doğruldacaqsan. Nəticə verməyən Mutu göndərildi, əvəzinə 18 ilə 21 klub dəyişən Bojoviç gətirildi. Hər iki məşqçi Azərbaycana vaxt keçirməyə gəlmişdilər. Pullarını qazanıb getdilər. Olan isə ölkənin ən köklü köklü komandasına oldu".
Hüseynov "Neftçi"yə yerli baş məşqçinin rəhbərlik etməli olduğunu da söyləyib: "Hələ də anlaya bilmirəm ki, yerli mütəxəssislərimizə inamsızlıq nədən qaynaqlanır? Statistikaya nəzər yetirsək, bu klubda azərbaycanlı məşqçilərin daha çox uğur qazandığını görə bilərik. Rəhbərlik "Neftçi"nin nəticə qazanmasını istəyirsə, ilk növbədə azərbaycanlı məşqçilərə üstünlük verilməlidi. Yox, yola əcnəbiylə davam edəcəklərsə, onda heç olmasa klubun adına və tarixinə layiq mütəxəssis dəvət etsinlər".
ABDULLA İSMAYILOĞLU
