Yunis Hüseynov: “Regionlara futbolu qaytarsalar inkişaf olacaq”

"AFFA-nın İcraiyyə Komitəsinin iclasında idman prinsiplərinin pozulmaması əsas götürülüb".

Bunu İdman.bizə veteran futbolçu Yunis Hüseynov deyib.

Mütəxəssis AFFA-nın İcraiyyə Komitəsinin iclasında qəbul olunan qərarları dəyərləndirib. O bildirib ki, "Qəbələ"nin Premyer Liqanı tərk etməsi çox üzücüdür: "Nəinki mən, bütün mütəxəssislər, jurnalistlər də bunu istəməzdi. Çünki onların infrastrukturu çox gözəldir. Stadionları, bazaları, akademiyaları yüksək səviyyədədir. Düşünürəm ki, onlar 1 il I Liqada oynayıb yenidən Premyer Liqaya qayıdacaqlar. Ən azı buna ümid edirəm. Qərarlardan biri gələcəkdə klub sayının artırılmasıdır. İnanıram ki, komandaların sayı artırılsa, daha yaxşı olacaq. Regionlara futbolu qaytarsalar inkişaf da artacaq. Komandaların sayının artmasını gözləyək".

Hüseynov legioner limiti ilə bağlı verilən qərarı da şərh edib: "7+4 limiti dəyişməz qaldı. Bir mövsüm sonra bu, 8+3-ə dəyişdirilə bilər. Həmin hal isə təbii ki, büdcəsi çox olan klublara sərf edəcək. Onlar gətirdikləri legioneri oynatmaq istəyirlər. Amma 7+4 limiti qalsa, daha yaxşı olar. Milli komandamıza görə daha sərfəli bu olardı".

Qeyd edək ki, İcraiyyə Komitəsinin iclasından sonra "Qəbələ"nin gələn il Premyer Liqanı tərk edəcəyi dəqiqləşib. Yeni mövsümdə I Liqada ilk yeri tutan komanda bölgə klubunu əvəzləyəcək. Hazırda "Qaradağ Lökbatan" 53 xalla yarışın lideridir.

Emin Ağa
İdman.biz