Sport24.az
Ötən gün 1-ci Liqada futbol ab-havasını aşan hadisə baş verib. Premyer Liqaya yüksəlmək uğrunda mübarizədə 3 əsas namizəddən ikisinin qarşılaşması oyun baxımından özünü doğruldub. Yevlaxda baş tutan "Karvan" - "İmişli" matçında 5 qol vurulub ki, bunlardan da üçünə meydan sahibləri imza atıb. Ancaq qarşılaşmanın son dəqiqəsində yevlaxlı azarkeşlərlə qonaq komandanın futbolçuları arasında yaranan münaqişə nəticəsində birincilər tərəfdən meydana yad əşyalar atılıb. Lakin "İmişli"nin futbolçuları da əsəblərinə sahib çıxa bilməyib. Nəticədə baş hakim Rəvan Həmzəzadə xeyli oyunçuya vərəqə göstərib.
Protokola nəzər saldıqda kimin nə etdiyini təxmin etmək çətin deyil. Sarı vərəqələr emosiyalarına sahib çıxa bipməyənlərə göstərilibsə, "qırmızı"ya tuş gələn İdris İnqilablının cəzasının səbəbi təcavüzkar davranış kimi səciyyələndirilib.
Həmzəzadənin verdiyi qərar tam ədalətlidi. Çünki İdris azarkeşlərin meydana atdığı butılkanı yenidən fanatlara atıb. Ancaq baş hakim daha bir "təcavüz"ü gözündən qaçırıb. Söhbət ikinci hissədə oyuna daxil olmuş Bahadur Həziyevin də eyni hərəkətə yol verməsindən gedir. Aydın məsələdir ki, Rəvan bu davranışı görsəydi, eyni qərarı verərdi. Ancaq referinin gözündən qaçsa da, İntizam Komitəsinin bu hadisəyə hüquqi qiymət verməsi çox vacibdi. Əks halda, 1-ci Liqada əməlli başlı cəbhə zonası yaranar.
