Sport24.az
"Kəpəz"də vəziyyət hələ də qarışıq və qeyri-müəyyəndir. Rəhbərliklə bağlı gah bir məlumat yayılır, gah başqa. Eyni vəziyyət baş məşqçi məsələsində də müşahidə olunur. Ən pisi isə odur ki, klubda sabitlik yoxdur". Bu sözləri Sport24.az-a açıqlamasında Vidadi Rzayev deyib.
Veteran futbolçu ötən mövsüm komandanı Premyer Liqada saxlayan Azər Bağırovun komandadan gedişinə görə tənqid edib:
"Fikrimcə, baş məşqçi kim olur-olsun, əsas olan onun işinə ciddi, məsuliyyətli və planlı yanaşmasıdır. Siz də, mən də illərdir futbolun içindəyik və bilirik ki, nəticə yalnız düzgün idarəetmə ilə gəlir. Azər Bağırovun komandadan ayrılması da sual doğurur. O, "Kəpəz"i Premyer Liqada saxlamışdı, buna baxmayaraq niyə gedir? Bu məsələnin səbəbləri tam aydın deyil. Bunu araşdırmaq lazımdır. Deyirlər ki, Gəncə futbolundakı təzyiqlərə görə getdi. "Şamaxı"nın azarkeşi yoxdur ki? Orda da futbola sevgi var. Sponsor məsələsi də hələ tam həll olunmayıb və bu da vəziyyəti daha da çətinləşdirir. Ümumilikdə, "Kəpəz"də növbəti mövsüm də asan olmayacaq kimi görünür. Komanda yenə Premyer Liqada qalmaq uğrunda mübarizə aparacaq və əsas sual budur: bu şəraitdə sabit və güclü bir sistem qurmaq mümkün olacaqmı?".
Qeyd edək ki, "Kəpəz" ötən mövsüm Misli Premyer Liqasını 27 xalla 10-cu pillədə başa vurub.
