Idman.biz
"Mövsümün ilk hissəsindən sonra 10 xal toplamışıq. Bu, pis nəticə deyil".
Bunu "Sumqayıt"ın müdafiəçisi Pedro Pinto sportnet.az-a müsahibəsi zamanı deyib.
Həmin müsahibəni təqdim edirik.
— Matçı necə dəyərləndirirsiniz?
— Düşünürəm ki, oyunu iki hissəyə bölmək olar. Birinci hissə bizim üçün daha yaxşı alındı, oyunumuzu qura bildik və meydanda istədiklərimizi etməyə çalışdıq. İkinci hissədə isə komanda olaraq xarakter göstərdik, müsbət münasibət və güclü mentalitet ortaya qoyduq. Bu da bizim üçün çox vacib idi.
— Tez-tez mentalitet faktorunu vurğulayırsınız. Bunun səbəbi nədir?
— Çünki futbolu fərqli edən əsas məqam məhz mentalitetdir. Komandada yeni futbolçular var və onlar hələ uyğunlaşma mərhələsindədirlər. Amma ümumi götürsək, komanda olaraq düzgün yoldayıq və inkişaf edirik.
— Şəxsi çıxışınızı necə qiymətləndirirsiniz?
— Mövsümün ilk hissəsindən sonra 10 xal toplamışıq. Bu, pis nəticə deyil. Amma mən hər zaman deyirəm ki, fərdi göstəricilərdən daha önəmlisi komandanın nəticəsidir. Bu müddətdə çox şey öyrəndim və gələcəkdə daha yaxşı ola bilərəm.
— Bu nəticəni uğurlu saymaq olarmı?
— Bəli, hesab edirəm ki, bu, yaxşı nəticədir. Təşkilati məsələlər və qarşılaşdığımız çətinlikləri nəzərə alsaq, əldə etdiyimiz nəticə müsbətdir. Hər zaman istədiyimiz kimi komanda oyunu sərgiləyə bilməsək də, ümumi mənzərə qənaətbəxşdir.
— İlk hissədə məğlub olmuşdunuz. Bu iki oyunu necə müqayisə edərdiniz?
— Bunlar tamam fərqli oyunlar idi. Nə gün eyni idi, nə də şərait. Rəqiblər də fərqli idi. Ona görə bu iki qarşılaşmanı müqayisə etmək düzgün olmaz.
