Idman.biz
İtaliya Seriya A-nın 30-cu turu çərçivəsində keçirilən "Roma" - "Leççe" qarşılaşması ev sahiblərinin minimal hesablı qələbəsi ilə başa çatıb. Romadakı "Olimpiya" stadionunda baş tutan görüşdə azarkeşlər cəmi bir qolun şahidi olublar.
İdman.Biz xəbər verir ki, oyunun taleyini ikinci hissədə vurulan yeganə qol həll edib. Matçın 57-ci dəqiqəsində Robinyo Vaz rəqib qapısına yol taparaq "canavarlar"a vacib qələbə qazandırıb. "Leççe"nin hesabı bərabərləşdirmək cəhdləri nəticəsiz qalıb.
Bu qələbədən sonra "Roma" xallarının sayını 54-ə çatdıraraq turnir cədvəlində altıncı pillədə qərarlaşıb. "Leççe" isə 27 xalla 18-ci yerdə qalıb və təhlükəli zonadan uzaqlaşa bilməyib.
20:35
İtaliya Seriya A-nın 30-cu turu çərçivəsində keçirilən oyunlar maraqlı anlarla yadda qalıb. "Latsio" səfərdə, "Atalanta" isə doğma meydanda rəqiblərini məğlub edərək turnir cədvəlindəki mövqelərini yaxşılaşdırıblar.
İdman.Biz xəbər verir ki, "Latsio" səfərdə "Bolonya"nı 2:0 hesabı ilə üstələyib. Matçın qəhrəmanı dubla imza atan Kennet Teylor olub. Meydan sahibləri hesabı bərabərləşdirmək şansı əldə etsələr də, Rikkardo Orsolini penaltidən yararlana bilməyib.
Bu qələbədən sonra "Latsio" xallarını 43-ə çatdıraraq səkkizinci pilləyə yüksəlib, "Bolonya" isə 42 xalla doqquzuncu yerə geriləyib.
Günün digər qarşılaşmasında "Atalanta" öz meydanında "Verona"nı qəbul edib. Gərgin keçən oyunda yeganə qolu Davide Dzappakosta vurub - 1:0.
Bu nəticə ilə "Atalanta" 50 xalla yeddinci pillədəki yerini möhkəmləndirib. "Verona" isə 18 xalla 19-cu yerdə qalaraq təhlükəli zonadan uzaqlaşa bilməyib.
Qeyd edək ki, "Atalanta"nın kapitanı Marten de Roon bu matçda meydana çıxaraq klub tarixində ən çox oyun keçirən (436 matç) futbolçu rekordunu yeniləyib.
17:51
İtaliya Seriya A-nın 30-cu turu çərçivəsində keçirilən "Komo" - "Piza" matçı meydan sahiblərinin mütləq üstünlüyü ilə başa çatıb. "Cuzeppe Siniqalye" stadionunda baş tutan qarşılaşmada "Komo" rəqib qapısından beş cavabsız top keçirib.
İdman.Biz xəbər verir ki, oyunda hesabı yeddinci dəqiqədə Assane Diao açıb. 29-cu dəqiqədə Anastasios Duvikas fərqi ikiyə çatdırıb. İkinci hissənin startında Martin Baturina (48-ci dəqiqə) hesabı 3:0 edərək matçın taleyini böyük ölçüdə həll edib. Görüşün sonlarında isə Nikolas Pas (75) və Maksimo Perrone (81) fərqlənərək yekun hesabı müəyyənləşdiriblər - 5:0.
Bu qələbədən sonra xallarının sayını 57-yə çatdıran "Komo" turnir cədvəlində dördüncü pillədəki mövqeyini möhkəmlədib. Cəmi 18 xalı olan "Piza" isə sonuncu - 20-ci yerdə qalmaqda davam edir.
Növbəti turda "Komo" aprelin 6-da səfərdə "Udineze"nin qonağı olacaq. "Piza" isə bir gün əvvəl doğma meydanda "Torino"nu qəbul edəcək.
