Şakir Seyidov: "Hakimin qərarı ilə razılaşmalı idik" - MÜSAHİBƏ

"Həmin vaxt hakim epizoda yaxın idi. Topa toxunuşum var idi".

Bunu "Kəpəz"in futbolçusu Şakir Seyidov futbolinfo.az-a müsahibəsində deyib.

Həmin müsahibəni təqdim edirik.

– Milli fasilədən öncəki son turda "Qarabağ"a qalib gəldiniz və bu, cari mövsümdə Ağdam təmsilçisi üzərində ikinci qalibiyyətiniz oldu…

– Oyuna yaxşı hazırlaşmışdıq. Bilirdik ki, "Qarabağ" topla oynamağı sevir. Bunu nəzərə alaraq meydana çıxmışdıq. Əks-hücumda oynayaraq əlimizə düşən imkandan lazımınca istifadə etdik və qələbə qazandıq. Meydanı 3 xalla tərk etdiyimiz və azarkeşlərimizi sevindirdiyimiz üçün şadam.

– Kamilo Duranla epizodunuz çox müzakirə edildi. Sizcə, hakim həmin epizodda penalti təyin etməməklə düz etdi?

– Həmin vaxt hakim epizoda yaxın idi. Topa toxunuşum var idi. Qərarı hakim verir. Referi o anda nə qərar versəydi, razılaşmalı idik.

– Millinin toplanışına "Kəpəz"dən heç bir futbolçunun çağırılmamasını necə qarşıladınız? Komandanızdan kim və ya kimlər yığmaya dəvəti haqq edirdi?

– Milli komandanın baş məşqçisi var. Mən deyə bilmərəm ki, kimləri çağırıb, kimləri çağırmamalıdırlar. Yığmaya dəvət alan hər bir futbolçu o formanı layiqincə daşımalıdır. Çağırılmayan futbolçular da öz üzərlərində işləyib şanslarını gözləməlidirlər.

– Fasilədən sonrakı ilk oyunda "Qəbələ" ilə üz-üzə gələcəksiniz. Bu matçdan 3 xalla ayrılmağı bacaracaqsınız?

– Biz hər oyuna qələbə üçün çıxırıq. Yenə məqsədimiz eyni olacaq. "Qəbələ" ilə görüşə də 3 xal əldə etmək üçün çıxacağıq. Məqsədimizə çatmaq üçün əlimizdən gələni edəcəyik.

– Milli fasilədən öncəki son 4 turda "Kəpəz" 8 xal qazanmışdı. Bu mənada fasilənin sizə zərəri dəyməyəcək?

– Fasilənin bizə zərərinin dəyəcəyini düşünmürəm. Uğurlu seriyanı davam etdirməyə çalışacağıq.

– "Kəpəz" hazırda 12-ci pillədən 13, 11-ci pillədən isə 5 xal öndədir. Bu, komandanızın Premyer Liqadakı yerini qoruyacağını əminliklə söyləməyə əsas verirmi?

– Turnir cədvəlində daha da irəli getməyə çalışırıq. Arxaya baxmırıq, öndəki rəqibə nəzər yetiririk. Mövsümü daha yaxşı pillədə bitirmək üçün əlimizdən gələni edəcəyik.