Idman.biz
Nisbətən gənc yaşına baxmayaraq, 21 yaşlı Şahin Şahniyarov son illərdə "Qəbələ"nin əsas futbolçularından biridir. Cari mövsümün rəqəmləri də bunu təsdiqləyir - o, "Qəbələ"nin keçirdiyi bütün 17 oyunda iştirak edib və onların 16-da start heyətində meydana çıxıb.
İdman.Biz oxucuların diqqətinə "Qəbələ"nin yarımmüdafiəçisi ilə müsahibəni təqdim edir.
- Şahin, sən əslən gəncəlisən, amma "Qəbələ"də çıxış edirsən. Bu necə baş verdi?
- Məsələ ondadır ki, səkkiz yaşımdan Gəncədə ilk məşqçim Rafiq Qurbanovun rəhbərliyi altında futbolla məşğul olmuşam. Orada "Azəri TİM" uşaq komandasında çıxış edirdim. Amma Gəncədə futbolçu kimi inkişafım üçün uyğun şərait olmadığından, dayımın təkidi ilə "Qəbələ"nin akademiyasına köçdüm. O, həm məni, həm də valideynlərimi razı sala bildi. Yaxşı ki, onu dinləmişəm (gülümsəyir). Tam səmimi desəm, uşaq yaşlarından futbolçular üçün "Qəbələ"də yaradılan şərait az klubda var.
Əlbəttə, bu çox yaxşıdır. Çünki "Qəbələ" futbol akademiyasında olduğum müddətdə U15-dən başlayaraq U21-ə qədər demək olar ki, bütün yeniyetmə və gənclərdən ibarət milli komandaların heyətində çıxış etdim. Bundan əlavə, əsas milli komandada da oynamaq imkanım oldu. Düzdür, ölkənin əsas yığmasında cəmi bir oyun keçirmişəm – ötən ilin martında Belarus yığmasına qarşı yoldaşlıq görüşü. Məni o vaxt Fernandu Santuş dəvət etmişdi. Sonra isə rəsmi oyunlarda, görünür, risk etmədi (gülür).
- Bəs Ayxan Abbasov risk etdi?
- Ayxan müəllim həm mənə, həm də "Sabah"dan Xəyal Əliyevi dəvət göndərdi. O, Santuşun yerinə təyin olunan kimi bizi çağırıb söhbət etdi. Dedi ki, əsas millidə ehtiyatda oturmaqdansa, mütəmadi olaraq U21-də oynamaq bizim üçün daha yaxşıdır. Məncə, o, tamamilə haqlı idi.
- Amma bu il yaşa görə U21 limiti sənin üçün bitir…
- Ona görə də əsas milli komandaya düşmək üçün əlimdən gələni edəcəyəm! Axı mən "Qəbələ" hələ birinci liqada çıxış edəndə də milli komandada oynamışam.
- Amma indi "Qəbələ"nin yenidən ora düşməsi ehtimalı böyükdür.
- Biz buna yol verməyəcəyik! Həm mən, həm də klubumuzun digər bütün futbolçuları Premyer Liqada yerimizi qoruyacağımıza qəti əminik. Bunun üçün gücümüz də, potensialımız da var. Hətta öz aramızda söhbətlərdə belə, komandamızın heç bir futbolçusu buna şübhə etmir!
- Yeri gəlmişkən, potensialdan söz düşmüşkən. Bu mövsüm Premyer Liqada heç bir qol vurmamısan, halbuki çempionatda "Qəbələ"nin heç bir oyununu buraxmamısan. Yarımmüdafiəçi üçün bu, yumşaq desək, zəif göstəricidir. Premyer Liqada qalmaq və eyni zamanda milliyə düşmək istəyi belə olur?
- Bəli, haqlısınız, qol vurmamışam, amma üç məhsuldar ötürmə etmişəm. Əlbəttə, mənim səviyyəmdə olan futbolçu üçün bu da azdır. Komandamızın qalan oyunlarında mümkün qədər çox qol vurmağa çalışacağam.
- İlk qolu vuranda onu kimə həsr edəcəksən?
- Açığı, bu barədə düşünməmişəm… Amma yəqin ki, anama. Düzdür, o, yəqin ki, bunu bilməyəcək, çünki oyunlarıma gəlmir (gülür). Dayım və qardaşımdan fərqli olaraq, onlar Gəncədən gəlib "Qəbələ"nin oyunlarını mütəmadi izləyirlər, anam isə matçlarımızı yalnız televizordan izləyir.
