Idman.biz
"Qarabağ" hər şeyə qadir olan klubdur. Kimlərsə deyir ki, 11 xal lazımdır, məncə, 10 xal da kifayət edəcək. Çünki bundan sonra arxada gələn komandaların çoxu liderlər qrupunda yer alan kollektivlərlə qarşılaşacaq. Bu baxımdan qazanılacaq 3 xal "Qarabağ"ı pley-offa apara bilər. Aparmasa belə, "Qarabağ" oyunu ilə həmin mərhələyə layiq komandadır — həm oyunu, həm də Avropanı təəccübləndirməsi baxımından".
Bu sözləri millinin sabiq məşqçisi Şahin Diniyev deyib.
59 yaşlı mütəxəssis "Qarabağ"ın UEFA Çempionlar Liqasında pley-off şanslarını dəyərləndirib.
Şahin Diniyevin fikrincə, nəticənin necə olmasından asılı olmayaraq, "köhlən atlar"ı uğursuzluğa görə qınamaq düzgün deyil: "Gəlin futbola reallıq prizmasından baxaq. İnsan istinad nöqtəsini bilməsə, inkişaf edə bilməz. Bəzən özümüzü "Ayaks", "Napoli", "Liverpul"dan da güclü sayırıq, "Benfika"nı məğlub edəndə bunu böyük uğur kimi qəbul edirik. "Qarabağ" böyük qəhrəmanlıq edərək bizi bir növ nağıl aləminə apardı. İndi isə əksinə danışmağa başlamışıq. Ola bilsin, dediklərim kimlərinsə xoşuna gəlməsin, amma reallıq budur. "Qarabağ"da bəzən oyun alınır, bəzən yox. Deyiblər ki, bir mərmi eyni quyuya iki dəfə düşmür. Əgər məşqçi hansısa əvəzetməni fərqli etsəydi və bunun daha yaxşı nəticə verəcəyini bilsəydi, mütləq edərdi. Biz çox şişirtmişik, guya "Qarabağ"hamını məğlub etməli və mütləq pley-offa vəsiqə qazanmalıdır. İnanın, pley-offa düşsə, sabah ilk səkkizliyə düşməyi, hətta çempionluğu tələb edəcəyik", - deyə o, futbolinfo.az-a açıqlamasında deyib.
Şahin Diniyev əlavə edib: "Bəlkə də bu, "Qarabağ"ın günahıdır ki, bizi belə öyrədib. Amma artıq reallıqdan uzaqlaşıb xəyallar qururuq. Bu xəyallar gerçəkləşməyəndə isə mütləq günahkar axtarırıq — futbolçu, məşqçi və ya rəhbərlik. Əslində, günahkar onlar deyil, bizik. Çünki futbolumuzun hələ layiq olmadığı Çempionlar Liqasındayıq. Günahkar axtarırıqsa, özümüzə baxmalıyıq. Onlara təkcə buna görə də təşəkkür etməliyik ki, Çempionlar Liqasının himnini dinləyə bilirik. Daha yaxşısı olsa, hamımız sevinərik. Nəzərə almaq lazımdır ki, "Ayntraxt"la çətin oyun olacaq. Çünki bizim çempionatda fasilə olsa da, Almaniyada yarışlar yüksək tempdə davam edir. Adətən "Qarabağ" mövsümün əvvəlində formaya düşmək üçün xallar toplaya bilir və bu amil onlara problem yarada bilər. Amma "Qarabağ"dan hər şeyi gözləmək də olmaz. Komandaya uğurlar arzulayıram. Bu gün Azərbaycan klubunun Çempionlar Liqasındakı oyunlarından sadəcə həzz almalıyıq".
