Rəşad Sadıqov: “Əliyarın ilk qərarı penalti deyildi”

"Futbolçular amansız mübarizə göstərdilər. İstəkli və aqressiv idilər".

İdman.biz xəbr verir ki, bunu "Zirə"nin baş məşqçisi Rəşad Sadıqov deyib.

Gənc mütəxəssis Azərbaycan Premyer Liqasının XXXIV turunda "Qarabağ"a 0:1 hesablı məğlubiyyti şərh edib: "Yaxşı oyunlarımızdan birini keçirdik, rəqibimiz "Qarabağ" idi. Təəssüf ki, uduzduq. Çalışdıq, hesabı bərabərləşdirmək istədik. Alınmadı. Amma futbolçularımın bugünkü mübarizəsinə, istəyinə, əminliyinə görə fəxr etdim. Belə davam etməliyik. Qarşıda finala bərabər iki oyunumuz var".

Rəşad Sadıqov eyni epizodlara hakimlərin fərqli qərarlar verdiklərini bildirib: "Hakimlik haqda danışmaq istəmirəm. Hər şey ortadadır. Bunun üçün xüsusi mütəxəssis olmağa ehtiyac yoxdur. Məsələ eyni epizodlarda fərqli qərarların olmasındadır. VAR-a çağıran Cavid Cəlilovun "Qəbələ" ilə 5-ci turda VAR-a baxıb, penalti verilmədiyi epizoda baxsınlar. "Qarabağ"la görüşdə Elvin Cəfərquliyevin Məqsəd İsayevə arxadan "podkat" etdiyi epizod necə? O epizodlarda susub, bu epizodda Cavid Cəlilov Əliyar Ağayevi penalti üçün çağırırsa... Bu günün söhbəti deyil. Mövsüm başlayandan belədir.
Cavid Cəlilov çağırdı, təəccüblənmədim. Mən də epizoda baxırdım. Əliyarın ilk qərarı penalti deyildi. İnanmırdım ki, gedib qərarını dəyişərək penalti versin. Bir epizodda da Elvin Cəfərəquliyev Hacıağa Hacılıya qarşı kobud oynadı, orada da ikinci sarı vərəqə verilməliydi. Təəssüf ki, olmadı".

Qeyd edək ki, "Zirə" 52 xalla 3-cü pillədə qərarlaşıb.

İdman.biz