Sport24.az
"Kayrat"ın baş məşqçisi Rafael Urazbaxtin komandasının tarixində ilk dəfə UEFA Çempionlar Liqasının əsas mərhələsinə yüksəlməsini şərh edib. Sport24.az xəbər verir ki, Qazaxıstan çempionu Şotlandiya "Seltik"i ilə 0:0 hesabı ilə bitən cavab oyunundan (ilk oyun - 0:0) sonra penaltilər seriyasında 3:2 hesabı ilə qalib gəlib.
Sports24.kz Urazbaxtinin sözlərini belə təqdim edib: "Bizim vəzifəmiz çempion olmaq, kuboku qazanmaq və Çempionlar Liqasının əsas mərhələsinə düşmək idi. Bir vəzifəni yerinə yetirdik. Ola bilsin ki, əsas mərhələ ilə bağlı düşünməmişdik. Düşünürdük ki, ən pis halda Konfrans Liqasında oynayacağıq. Amma indi uşaqlara deyirəm: yaman iş gördük. Hədəfimiz nə olacaq, görəcəyik, proqnoz verməyi sevmirəm, sakit və tədricən irəliləməyi xoşlayıram. Hətta ora düşdüyümüzə də inanmaq çətindir".
Qeyd edək ki, bundan əvvəl "Kayrat" ən yaxşı halda 2021/22 mövsümündə UEFA Konfrans Liqasının qrup mərhələsində oynamış və onda hər iki qarşılaşmada "Qarabağ"a məğlub olmuşdu - 1:2, 1:2.
