Sport24.az
Misli Premyer Liqasının XIX turunun "Neftçi" – "Qəbələ" oyunundan (1:0) sonra qonaq komandanın məşqçisi Georgi Çixradze jurnalistlərin suallarını cavablandırıb. Sport24.az xəbər verir ki, mütəxəssis əvvəlcə görüşlə bağlı fikirlərini bölüşüb…
– Maraqlı, dinamik oyun oldu. Bilirdik ki, "Neftçi" matçın əvvəlində sürətli oynayacaq. İlk 15 dəqiqədə sürətdə geri qaldıq. Rəqib oyuna aqressiv başladı. Nəticədə qol buraxdıq. Amma bundan sonra çox yaxşı oyun nümayiş etdirdik. İkinci hissədə daha çox qol şansı yaratdıq. Bəzi epizodlar var idi ki, onları necə əldən verdiyimiz maraqlı gəldi. Futboldur. Düşünürəm ki, bu gün məğlubiyyətə layiq deyildik.
– Prins Ovusu yüz faizlik epizodu dəyərləndirə bilmədiyi üçün çox məyus olmuşdu. Komanda yoldaşları ona təsəlli verirdi. Futbolçunu bu durumdan necə çıxarmaq olar?
– Prinsi sakitləşdirdik. Gənc oyunçudur, öz üzərində işləyir, inkişaf edir. Premyer Liqada ilk mövsümüdür. Belə şeylər olur.
– Rəqib "Neftçi" olduğu üçün bu gün qapıda Rza Cəfərova şans verdiz?
– Rzanı daha əvvəldən transfer etmək istəyirdik. Həmin vaxt alınmadı. Ona böyük ümidlər bəsləyirik. Rzanın potensialına bələdik. "Sabah"la kubok matçını yaxşı keçirmişdi. Ona görə bu gün qapıda Rzanın dayanacağını planlaşdırmışdıq.
