Sport24.az
Gənclər və İdman Nazirliyinin və Qəbələ Rayon İcra Hakimiyyətinin birgə təşkilatçılığı ilə "Qəbələ - İdman Paytaxtı 2025"in açılış mərasimi keçirilib. Sport24.az xəbər verir ki, Qəbələ Olimpiya İdman Kompleksində təşkil olunan tədbir müxtəlif idman növləri üzrə federasiyaların üzvlərinin paradı ilə start götürüb.
Azərbaycanın ərazi bütövlüyünün bərpası uğrunda canlarını fəda etmiş şəhidlərin və Bakı-Qroznı reysini yerinə yetirən "Azərbaycan Hava Yolları" Qapalı Səhmdar Cəmiyyətinə məxsus "Embraer 190" tipli sərnişin təyyarəsinin qəzaya uğraması nəticəsində həlak olanların xatirəsi 1 dəqiqəlik sükutla yad edildikdən sonra Dövlət Himni səsləndirilib.
Tədbirdə çıxış edən Quba Rayon İcra Hakimiyyətinin başçısının müavini Səidə Abbasova Qəbələnin 2024-cü ildə gördüyü işlərdən söz açıb.
O bildirib ki, ötən il Qubada müxtəlif idman tədbirləri təşkil olunub: "2024-cü il həmçinin Quba üçün müxtəlif idman növlərində əlamətdar hadisələrlə yadda qaldı, rayonumuzun futbol və basketbol klubları yaradılıb. İdmanın kütləviləşdirilməsi istiqamətində ciddi işlər görüldü. Qəbələyə bu şərəfli və məsuliyyətli vəzifənin öhdəsindən layiqincə gəlməyi arzu edirəm".
Qəbələ Rayon İcra Hakimiyyətinin başçısının müavini Ətayə Osmanova çıxışında Qubanın təcrübəsindən yararlanacaqlarını qeyd edib: "Belə bir tədbir münasibətilə gənclərimizi təbrik edirəm. Qəbələ rayonu nəinki Azərbaycanda, beynəlxalq aləmdə də turizm mərkəzi kimi tanınmaqdır. 2025-ci il üçün Qəbələ MDB Oyunları üçün "Gənclər Paytaxtı" MDB ölkələri arasında gənclər paytaxtı seçilib. İnanırıq ki, Qəbələ sözügedən idman tədbirlərinə layiqincə ev sahibliyi edəcək".
Gənclər və idman naziri Fərid Qayıbov idman bayramı münasibətilə iştirakçıları təbrik edib: "Təbii ki, bu qədər uşağı burada görmək bizi sevindirir. Bu ölkə başçımızın göstərişlərinə əsasən müvafiq qurumların uğurlu işinin nəticəsidir. İnanıram ki, burada gördüyümüz uşaqlar gələcəkdə uğurlu nəticələrə imza atacaq. Mən Quba sakinlərini təbrik edirəm. Ötən il Qubada keçirilən müxtəlif tədbirlər idmanın kütləviliyinin artmasına təsir göstərdi. İnanıram ki, Qəbələ rayon icra hakimiyyəti və müvafiq qurumlarla birgə bu il uğurlu işlər görəcəyik. Bu ilin sonunda Qəbələdə MDB oyunları da keçiriləcək. Bir sözlə, görüləcək işlərimiz çoxdur".
Rəsmi çıxışlardan sonra Fərid Qayıbov idman paytaxtının rəmzi açarını Ətayə Osmanova təqdim edib.Daha sonra "Qəbələ - İdman Paytaxtı 2025"in maskotu "Marşal" tamaşaçılara təqdim edilib.
İdman səfirləri – bədii gimnastika üzrə millinin məşqçisi Aliyə Paşayeva, futbol üzrə Azərbaycan millisinin skautu İlqar Qurbanov, sabiq cüdoçu Orxan Səfərov və milli idman növləri üzrə məşqçi Xəyyam Orucov çıxış ediblər.
Tədbirin bədii hissəsi gənc müğənni Mərdan Kazımovun ifasında musiqi nömrələri ilə davam edib.
Qeyd edək ki, Qəbələ şəhəri 2023-cü il dekabrın 7-də Gənclər və İdman Nazirliyi Kollegiya iclasında keçirilmiş səsvermə nəticəsində 2025-ci il üçün Azərbaycanın idman paytaxtı seçilib. "İdman paytaxtı"nın seçimində məqsəd regionlarda idmana olan marağın artırılması və inkişaf etdirilməsi, sağlam həyat tərzinin təbliğidir.
NUH, QƏBƏLƏ
