Idman.biz
"Qalatasaray"ın son illərdəki ən sabit çıxış edən futbolçularından biri olan Barış Alper Yılmaz bu transfer dönəmində də Avropa klublarının diqqət mərkəzindədir.
İdman.Biz xəbər verir ki, İngiltərə nəhəngləri 25 yaşlı futbolçunun transferi üçün böyük məbləğ ödəməyə hazırdır.
Çempion heyətini qorumaqla yanaşı, heyətini mühüm transferlərlə gücləndirmək istəyən "Qalatasaray"da hazırkı futbolçulara Avropadan maraq davam edir. Bu oyunçuların başında isə Barış Alper Yılmaz gəlir.
Türkiyəli futbolçu ötən mövsümün əvvəlində Səudiyyə Ərəbistanının "NEOM" klubuna mümkün transferi ilə bağlı "Qalatasaray" rəhbərliyi ilə fikir ayrılığı yaşamışdı. Lakin daha sonra komandada qalan Barış Alper Yılmaz ötən mövsüm qazanılan çempionluqda əsas fiqurlardan birinə çevrilib.
Səudiyyə Ərəbistanından gələn təklifə görə ötən il futbolçunun ayrılmasına icazə verməyən "Qalatasaray"a bu dəfə İngiltərə Premyer Liqası klubları müraciət edib. Bildirilir ki, "Everton" Türkiyə millisinin üzvü üçün təxminən 41 milyon avro təklif edib. Lakin İstanbul təmsilçisi bu təklifi rədd edib.
Bundan başqa, "Tottenhem" də Barış Alper Yılmazın durumunu yaxından izləməyə başlayıb.
"Qalatasaray" rəhbərliyi futbolçunu satmaq niyyətində deyil. Bununla belə, Barış Alper Yılmaz karyerasını Premyer Liqada davam etdirmək istəsə, onun transferinə maneə yaradılmayacağı bildirilir.
"Takvim"in məlumatına görə, belə bir vəziyyətdə "Qalatasaray" futbolçu üçün ən azı 50 milyon avro təzminat haqqı tələb edəcək.
