Idman.biz
İtaliya Futbol Federasiyasının prezidenti Qabriele Qravina rəsmən vəzifəsindən istefa verdiyini açıqlayıb.
İdman.Biz xəbər verir ki, bu qərar milli komandanın 2026-cı il Dünya Çempionatına vəsiqə qazana bilməməsindən sonra yaranan gərginlik fonunda qəbul edilib.
Pley-off mərhələsinin finalında Bosniya və Herseqovinaya penaltilər seriyasında məğlub olan "Azzurri" ardıcıl üçüncü dəfə mundialdan kənarda qalıb. Bu uğursuzluq İtaliyanın idman naziri Andrea Abodi və digər siyasi dairələrin kəskin tənqidlərinə səbəb olmuşdu.
Artıq yeni prezident seçkilərinin vaxtı da dəqiqləşib. Federasiyanın fövqəladə seçki assemblyası iyunun 22-də Romada keçiriləcək və qurumun yeni rəhbəri həmin gün bəlli olacaq.
2018-ci ildən İtaliya futboluna rəhbərlik edən Qravinanın gedişindən sonra baş məşqçi Cennaro Qattuzonun da yaxın saatlarda istefa verəcəyi gözlənilir.
