Idman.biz
Futbol üzrə İngiltərə Premyer Liqasının 36-cı turunda "Arsenal" səfərdə "Vest Hem"i 1:0 hesabı ilə məğlub edib.
İdman.Biz xəbər verir ki, oyunda yeganə qol 83-cü dəqiqədə vurulub. "Arsenal"ın belçikalı futbolçusu Leandro Trossar fərqlənərək komandasına vacib üç xal qazandırıb.
Matçın əlavə vaxtında "Vest Hem" hesabı bərabərləşdirsə də, qol qeydə alınmayıb. Baş hakim Kris Kavano VAR-ın müdaxiləsindən sonra epizodu monitorda izləyib və David Rayaya qarşı qayda pozuntusu qeydə alıb. Bundan sonra meydan sahiblərinin qolu ləğv edilib.
Bu, "Arsenal"ın Premyerliqada ardıcıl üçüncü qələbəsi olub. Mikel Artetanın komandası çempionatın başa çatmasına iki tur qalmış xalını 79-a çatdırıb. London klubu ikinci pillədə qərarlaşan "Mançester Siti"ni beş xal qabaqlayır. "Şəhərlilər"in isə ehtiyatda bir oyunu var.
"Vest Hem" 36 xalla turnir cədvəlində 18-ci pillədə, düşmə zonasında qalıb. Xilas zonasında yer alan "Tottenhem"in 37 xalı və ehtiyatda bir oyunu var.
19:22
Futbol üzrə İngiltərə Premyer Liqasının 36-cı turunda "Aston Villa" səfərdə "Börnli" ilə 2:2 hesablı heç-heçə edib.
İdman.Biz xəbər verir ki, meydan sahibləri səkkizinci dəqiqədə Ceydon Entoninin qolu ilə hesabı açıblar. "Aston Villa" 42-ci dəqiqədə Ross Barklinin qolu ilə tarazlığı bərpa edib.
İkinci hissədə qonaqlar önə keçiblər. 56-cı dəqiqədə Olli Uotkins fərqlənib. Lakin "Börnli" cəmi iki dəqiqə sonra Zian Flemminqin qolu ilə məğlubiyyətdən xilas olub.
Bu nəticədən sonra "Aston Villa" xalını 59-a çatdırıb və turnir cədvəlində beşinci pillədə qərarlaşıb. "Börnli" isə 21 xalla 19-cu sıradadır.
Paralel görüşlərdə də qalib müəyyənləşməyib. "Kristal Palas" və "Everton" arasında görüş 2:2 hesabı ilə başa çatıb. "Kristal Palas" xallarını 44-ə çatdıraraq 14-cü pilləyə, "Everton" isə 49-a çatdıraraq 10-cu pilləyə yüksəlib.
"Nottinqem Forest" isə "Nyukasl"la 1:1 hesablı heç-heçəyə razılaşıb. Bu hesabdan sonra ev sahibi komanda 43 xalla 15-ci pillədədir. "Nyukasl" isə 46 xalla 13-cüdür.
