Idman.biz
"Komandaya kömək etdiyim üçün xoşbəxtəm. Amma ən vacib məqam yenidən xallar qazanmağa başlamağımız idi".
Bunu "Karvan-Yevlax"ın portuqaliyalı qapıçısı Pedro Mateuş futbolinfo.az-a müsahibəsində deyib.
Həmin müsahibəni təqdim edirik.
– Zədəli olduğunuz üçün uzun müddət idi ki, "Karvan-Yevlax"a kömək edə bilmirdiniz. Yaşıl meydanlara qayıdış necə hissdir?
– Düzünü desəm, bu, mənim üçün böyük bir rahatlıqdır. Bütün karyeram ərzində heç vaxt məşq və ya oyunları dayandıracaq qədər ciddi zədə almamışdım. Bu, ilk dəfə idi və bu qədər uzun müddət məşq və oyunsuz qalmaq psixoloji cəhətdən çox çətin oldu. Amma həmin mərhələni arxada qoymağı bacardım və bundan sonra ümid edirəm ki, bütün oyunlarda komandama kömək edə biləcəyəm.
– "İmişli" ilə oyun ərzində bir neçə qurtarışla yadda qaldınız. Üstəlik, səkkiz oyun idi ki, xal qazana bilməyən "Karvan-Yevlax" uğursuz gedişata son qoydu. Qayıdışınızın uğurlu alındığını deyə bilərik?
– Komandaya kömək etdiyim üçün xoşbəxtəm. Amma ən vacib məqam yenidən xallar qazanmağa başlamağımız idi. Qarşıda hələ çox işimiz var.
– Növbəti turda doğma meydanda "Neftçi"ni qəbul edəcəksiniz. Rəqibiniz yeni baş məşqçinin rəhbərliyi altında çıxdığı ilk oyunda qələbə hesabını qoruya bilmədi. "Neftçi" ilə matçda hansı nəticəyə ümid edirsiniz?
– Güclü komandaya qarşı çətin oyun gözləyirik. Lakin evdə oynadığımız üçün maksimum səviyyədə mübarizə aparacaq və qələbə uğrunda döyüşəcəyik. Məqsədimiz yaxşı oyun göstərmək və xallar qazanmaqdır.
– 15 turdan sonra cəmi 6 xal toplamaq və turnir cədvəlində sonuncu pillədə olmaq komandanın üzərində əlavə təzyiq yaradırmı?
– Əlbəttə, turnir cədvəli çətin vəziyyətimizi göstərir, amma təzyiq futbolun bir hissəsidir. Komanda birlikdədir və oyundan-oyuna daha da yaxşılaşmağa köklənib.
– Yeni baş məşqçiniz Füzuli Məmmədov haqda fikirləriniz necədir? Onun gəlişindən sonra komandada nə kimi dəyişikliklər baş verib?
– Füzuli Məmmədov öz ideyaları ilə gəldi, komandaya daha çox təşkilatçılıq və intensivlik gətirdi. Biz onun tələblərini tədricən mənimsəyirik.
– Qarşıdakı turlarda sonuncu pillədən qurtulmaq, Misli Premyer Liqadakı yerinizi qorumaq şansınızı necə dəyərləndirirsiniz?
– Vəziyyətin çətin olduğunu bilirik, amma gördüyümüz işə inanırıq. Əgər diqqətli və rəqabətədavamlı qalsaq, bu vəziyyətdən çıxa, liqadakı yerimizi qoruya bilərik.
