La Liqa: "Real Madrid" "Sevilya"nı məğlub etdi, "Osasuna" "Alaves"i darmadağın etdi, "Levante" - "Real Sosyedad" heç-heçə - YENİLƏNİB + VİDEO

İspaniya La Liqasının 17-ci turunun "Real Madrid" və "Sevilya" komandaları arasında keçirilən oyun başa çatıb.

İdman.Biz xəbər verir ki, komandalar "Santyaqo Bernabeu" stadionunda (Madrid) oynayıblar. Meydan sahibləri 2:0 hesablı qələbə qazanıblar.

"Real Madrid"in yarımmüdafiəçisi Cud Bellingem matçın ilk qolunu 38-ci dəqiqədə vurub. Kilian Mbappe 86-cı dəqiqədə penaltidən qolla komandasının üstünlüyünü ikiqat artıraraq yekun hesabı müəyyən edib.

İspaniya liqasında 18 oyundan sonra "Real Madrid" 42 xala malikdir və turnir cədvəlində ikinci yerdədir. "Sevilya" 17 oyundan sonra 20 xala malikdir və 10-cu yerdə qərarlaşıb.

23:59

"Osasuna" La Liqanın 17-ci turunda evdə "Alaves" üzərində 3:0 hesablı qələbə qazanıb.

İdman.Biz-in məlumatına görə, meydan sahiblərindən Ante Budimir dubl edib. Daha bir qolu Raul Qarsiya de Haro vurub.

"Osasuna" 18 xala malikdir və La Liqa turnir cədvəlində 12-ci yerdədir. Eyni xala malik "Alaves" əlavə meyarlara görə "Osasuna", "Rayo Valyekano" və "Malyorka" komandalarından geri qalaraq 15-ci yerdədir.

22:19

İspaniya La Liqasının 17-ci turunun "Levante" və "Real Sosyedad" arasında keçirilən oyun başa çatıb. Komandalar "Estadio Ciudad de Valencia" stadionunda (Valensiya) qarşılaşıblar.

İdman.Biz bildirir ki, oyun 1:1 hesablı heç-heçə ilə başa çatıb.

"Real Sosyedad"ın hücumçusu Takefusa Kubo oyunun ilk qolunu 45+1-ci dəqiqədə vurub, 90+4-də isə Adrian De La Fuente penaltidən bərabərlik qoluna imza atıb.

İspaniya liqasında 17 oyundan sonra "Real Sosyedad" 17 xalla turnir cədvəlində 15-ci yerdədir. "Levante" 16 oyundan sonra 10 xalla 20-ci yerdədir.

Bu gün keçirilmiş digər matçda "Ovyedo" "Selta" ilə heç-heçə oynayıb - 0:0.