Sport24.az
Mövsümün startını boşa verən "Kəpəz" Adil Şükürovun gəlişi ilə baxımlı oyun və ən əsası qazandığı xallarla azarkeşlərini sevindirməyi bacardı ki, bunun da nəticəsi olaraq "sarı-göylər" elitada yerini qorudu. Gəncə klubunun heyətində özünü yaxşı tərəfdən göstərənlərdən biri də Latir Fal oldu. Portuqaliyalı legioner Sport24.az-a müsahibəsində həm komandasının, həm də özününü çıxışını dəyərləndirib.
- Başa çatan mövsüm yaddaşında necə qaldı?
- Çox ağır marafon oldu. Amma komanda qarşıya qoyulan hədəfə çatdı. "Kəpəz" elitada mövqeyini qorudu.
- Sənə görə çempionatın ən ağır oyunu hansı oldu?
- Bütün qarşılaşmalar bizim üçün ağır keçdi. Ancaq 4-cü dövrədə "Qarabağ"a qarşı matç xüsusi qeyd edərdim.
- Mövsüm ərzində öz çıxışından razı qaldın?
- Bu barədə məşqçilər korpusu danışa bilər. Yalnız onu deyə bilərəm ki, bacardığım qədər "Kəpəz"ə faydalı olmağa çalışdım.
- Premyer Liqanın səviyyəsi necədi?
- Maraqlı və rəqabətli çempionatınız var. Bütün klubların heyətində keyfiyyətli futbolçular çıxış edir.
- Azərbaycanı ölkə kimi necə xarakterizə edərdin?
- Daha çox Gəncədə vaxt keçirdim. Qədim və maraqlı şəhərdi. Ölkə olaraq da zənginsiz, insanlarınız istiqanlı, qonaqpərvərdi.
- Mətbəximizlə aran necədi?
- Bütün növ kabablarınızı sevirəm.
- "Kəpəz"in legionerləri arasında bizim dildə ən çox danışan sənsən...
- Bəli, bəzi sözlərinizi öyrənmişəm. Futbol oynadığın ölkənin dilini, mədəniyyətini, mentallığını bilməlisən. Mən də ilk növbədə buna çalışmışam. Azərbaycan dilində "nətərsən, nə var, nə yox, yavaş-yavaş, sağ ol..." kimi sözləri bilirəm. Məncə, münasibət qurmaq üçün bu sözlər kifayət edir.
- Sonda bizim dildə nə demək istərdin?
- Sağ ol Azərbaycan (gülür).
ABDULLA İSMAYILOĞLU
