Portuqaliya millisinin baş məşqçisi Jorje Jezuş Bernardu Silvanın yığmada az oyun vaxtı alması və düşərgəni tərk etməsi ilə bağlı yayılan məlumatlara münasibət bildirib.
İdman.Biz "Cabine Desportiva"ya istinadən xəbər verir ki, baş məşqçi futbolçunun az oynamasını taktiki qərarlarla izah edib:
"Böyük klubların futbolçuları milliyə gəlib heyətə düşməyəndə narazı qalırlar. Amma yığmanın səviyyəsi o qədər yüksəkdir ki, eyni vaxtda meydanda yalnız 11 nəfər ola bilər. Bernardu mənim taktiki qərarlarıma görə az oynayır. Həmin məqamda Vitinyanın daha faydalı ola biləcəyini düşünürdüm. Bununla belə, Bernardu heç vaxt millinin heyətindən kənarda qalmayacaq".
Jezuş yarımmüdafiəçinin mövsümün əvvəlindən inkişaf etdiyini də vurğulayıb:
"Ona dedim ki, xeyli yaxşılaşmısan, daha sərbəst və aqressiv oynayırsan. Məhz buna görə "Real Madrid"də yer qazanmısan və onu itirməmək vacibdir".
Baş məşqçi futbolçunun səhhəti ilə bağlı vəziyyətə də aydınlıq gətirib:
"Oyundan sonra o, Fabio Silva ilə birlikdə boş zonalara açılmalar üzərində işləmək üçün icazə istədi. Daha sonra şikayətləri ilə bağlı tibbi şöbəyə müraciət etdi və müayinədən keçdi. Zədə ciddi deyil, amma növbəti iki gün ərzində meydana çıxması həm özü, həm də "Real Madrid" üçün risk yarada bilərdi. Bu, əzələ zədəsi deyil, lakin bir-iki günə sağalmaq mümkün deyildi".
Qeyd edək ki, Portuqaliya millisi UEFA Millətlər Liqasının beşinci turunda Danimarkaya 1:4 hesabı ilə məğlub olub. Bernardu Silva həmin görüşdə 79-cu dəqiqədə meydana çıxıb.