Idman.biz
"Avropa Liqasında asan rəqib olmur. Əlbəttə, istər I təsnifat mərhələsində qarşılaşacağımız "Tsele", istərsə də bu cütün qalibi ilə oynayacaq "Partizan" və ya AEK kifayət qədər güclü, ciddi rəqiblərdir".
İdman.biz xəbər verir ki, bunu Teleqraf-a açıqlamasında "Sabah"ın idman direktoru İqor Ponomoryov komandanın UEFA Avropa Liqasındakı rəqiblərini dəyərləndirərkən deyib.
Klub rəsmisi püşkün kifayət qədər ciddi olduğunu söyləyib: "Partizan" bizə tanış rəqibdir. Bu komanda ilə 2 il öncə qarşılaşmışdıq və ancaq penaltilər seriyasında uduzmuşduq. Hazırda isə yalnız "Selye" ilə oyunlar barədə düşünürük".
65 yaşlı mütəxəssis yaxın günlərdə baş məşqçi məsələsinə aydınlıq gətiriləcəyini və komandanın toplanışa başlayacağını qeyd edib: "Həm baş məşqçi təyinatı, həm də təlim-məşq toplanışı ilə bağlı ən qısa müddətdə ətraflı məlumat veriləcək".
Ponomoryov avrokuboklar öncəsi komandaya yeni futbolçuların da cəlb ediləcəyini vurğulayıb: "Əlbəttə, yeni transferlər gözlənilir. Bu sahədə bizim seleksiya komandası yaxşı iş ortaya qoyub. İnanıram ki, yeni transferlərimiz də komandamızı daha da gücləndirəcək".
Qeyd edək ki, "Sabah" UEFA Avropa Liqasının I təsnifat mərhələsində ilk oyununu iyulun 10-da, cavab görüşünü isə iyulun 17-də keçirəcək.
İdman.biz
