Lent.az
"Neqreyra işi" üzrə özəl ittihamçı qismində çıxış edən Madrid "Real"ının hüquqşünasları dekabrın 12-də keçirilən məhkəmə iclası zamanı "Barselona"nın prezidenti Joan Laportanı dindiriblər.
Lent.az xarici mediaya istinadla bildirir ki, "kral klubu"nun hüquqşünasları Laportadan Hakimlərin Texniki Komitəsinin (CTA) keçmiş vitse-prezidenti Xose Mariya Neqreyraya edilən ödənişlərin 800% artırılmasının səbəbləri, həmçinin Neqreyranın oğlunun "blauqrana" üçün hakimlər barədə hazırlanmış, lakin ictimaiyyətə açıqlanmayan hesabatların tərtibində iştirakı ilə bağlı suallar veriblər. Bundan əlavə, "Real"ın hüquqşünaslarını "Barselona"nın bu ödənişləri niyə vergi orqanlarından göstərmədiyi və onların ilkin mənbəyinin niyə gizlədildiyi maraqlandırıb.
Xatırladaq ki, 2023-cü ildə "blauqrana" klubu Neqreyraya edilən ödənişlərlə bağlı rüşvət ittihamı ilə üzləşib. Neqreyra İspaniya Kral Futbol Federasiyasında (RFEF) çalışıb. "Barselona"nın 2001–2018-ci illər arasında ona ümumilikdə təxminən 8,4 milyon avro məbləğində ödəniş etdiyi iddia olunur.
Kataloniya klubunun versiyasına görə, Neqreyra hakimliklə bağlı texniki hesabatların hazırlanması üçün xarici məsləhətçi qismində cəlb edilib. CTA-nın keçmiş vitse-prezidenti isə hakimlərə təsir göstərmək məqsədilə rüşvət aldığını inkar edir.
