Idman.biz
Futbol üzrə İngiltərə çempionatında bu həftəsonu səkkizinci turun oyunları keçiriləcək. Mövsümün ilk yeddi turundan sonra liderlik uğrunda mübarizə getdikcə gərginləşir.
İdman.Biz xəbər verir ki, yeddi turdan sonra "Mançester Siti" 21 xalla turnir cədvəlinə başçılıq edir. Komanda keçirdiyi bütün oyunlarda qələbə qazanıb. Ən yaxın izləyicisi "Arsenal" 3 xal geri qalır. Üçüncü pillədə qərarlaşan "Brayton"un isə 16 xalı var. İlk beşliyi müvafiq olaraq 13 xalla "Çelsi" və 12 xalla "Liverpul" tamamlayır.
Turnir cədvəlinin aşağı pillələrində də vəziyyət gərgindir. Yeddi xalı olan "Mançester Yunayted" yalnız 13-cü yerdə qərarlaşıb. Mövsümdə ilk qələbəsini ötən turda qazanan "Tottenhem" isə 16-cı pillədədir. Son üç yerdə müvafiq olaraq 6, 5 və 4 xal toplayan "Koventri", "Fulhem" və "Sanderlend" qərarlaşıb.
VIII tura oktyabrın 23-də keçirilən "İpsviç" - "Nottingem Forest" oyunu ilə start verilib. Qarşılaşma 1:1 hesabı ilə başa çatıb. Neko Uilyamsın qoluna ev sahibləri Xulio Ensisonun dəqiq zərbəsi ilə cavab veriblər. Bu nəticədən sonra "İpsviç" 10 xalla doqquzuncu pilləyə yüksəlib, 6 xalı olan "Nottingem Forest" isə düşmə zonasını tərk edib.
"Aston Villa" - "Mançester Siti"
Şənbə gününün əsas qarşılaşması "Villa Park" stadionunda keçiriləcək. Unay Emerinin rəhbərlik etdiyi "Aston Villa" mövsümə qüsursuz start verən "Mançester Siti"nin qələbə seriyasını dayandırmağa çalışacaq.
Enso Mareskanın rəhbərlik etdiyi "şəhərlilər" çempionatda keçirdikləri yeddi oyunun hamısında qalib gəliblər. Komanda bu görüşlərdə 19 qol vurub, qapısında isə 7 top görüb. Ötən tur "İpsviç" üzərində çətinliklə 3:2 hesablı qələbə qazanan "Mançester Siti" həftəiçi UEFA Çempionlar Liqasında Yunanıstanın AEK klubunu 5:1 hesabı ilə darmadağın edib. Həmin görüşün qəhrəmanı het-trikə imza atan Fil Foden olub.
Birmingemə səfər ərəfəsində Mareska AEK ilə oyunu buraxan Erlinq Holandın meydana çıxmağa hazır olduğunu təsdiqləyib. Norveçli hücumçu cari mövsümdə İPL-də artıq 8 qol vurub. Bununla belə, Mateo Kovaçiç, Mateus Nunyes və Niko O"Raylinin qarşılaşmada iştirakı ilə bağlı suallar qalır. Antuan Semenyo isə dizindən aldığı zədə səbəbindən təxminən səkkiz həftə yaşıl meydanlardan kənarda qalacaq.
"Aston Villa" 8 xalla turnir cədvəlinin 12-ci pilləsində qərarlaşsa da, bu göstərici komandanın hazırkı formasını tam əks etdirmir. Emerinin yetirmələri bütün turnirlərdə keçirdikləri son altı oyunda məğlub olmayıblar və bu müddətdə beş qələbə qazanıblar.
Ötən tur səfərdə "Nyukasl"ı 1:0 hesabı ilə məğlub edən Birmingem təmsilçisi çərşənbə günü Norveçin "Vikinq" klubuna da 3:1 hesabı ilə qalib gəlib. Bununla da komandanın Çempionlar Liqasındakı qələbə seriyası üç oyuna çatıb.
Bununla belə, heyətlə bağlı problemlər ev sahiblərinin işini çətinləşdirə bilər. Amadu Onana, Matteo Rucceri və Aaron Van-Bissaka zədə səbəbindən meydana çıxa bilməyəcəklər. Yohann Manzambinin oynayıb-oynamayacağı isə matçdan əvvəl dəqiqləşəcək.
Komandalar arasındakı son qarşılaşmaların statistikası da oyuna əlavə maraq qatır. "Aston Villa" İPL-də "Mançester Siti" ilə keçirdiyi son altı görüşün dördündə qalib gəlib. Üstəlik, Holand Birmingem təmsilçisi ilə əvvəlki beş qarşılaşmada cəmi bir dəfə fərqlənib.
Beləliklə, turnir liderini yalnız çətin səfər deyil, həm də son illərdə ona qarşı uğurlu nəticələr əldə edən rəqib gözləyir. "Mançester Siti"nin əsas vəzifəsi qələbə seriyasını davam etdirməklə yanaşı, çətin rəqibə qarşı da üstünlüyünü sübut etmək olacaq.
"Liverpul" - "Brayton"
Bazar günü turun diqqətçəkən qarşılaşmalarından biri də "Enfild" stadionunda keçiriləcək. Turnir cədvəlinin beşinci pilləsində yer alan və 12 xal toplayan "Liverpul" ilk üçlükdə möhkəmlənən "Brayton"u qəbul edəcək.
Fabian Hürzelerin rəhbərlik etdiyi "qağayılar" mövsümün ilk hissəsinin əsas sürprizlərindən birinə çevriliblər. Komanda yeddi oyunda 23 qol vuraraq İPL-in ən məhsuldar kollektivi olub. "Brayton"un qapısından isə cəmi 5 top keçib. Üstəlik, komanda çempionatdakı son dörd matçın hamısında qapısını toxunulmaz saxlayıb.
Ötən tur "Brayton" "Kristal Pelas"ı 5:0 hesabı ilə darmadağın edərək hücumdakı gücünü bir daha nümayiş etdirib. Bununla belə, komandanın bütün turnirlərdəki qələbə seriyası cümə axşamı UEFA Konfrans Liqasında Çexiyanın "Yablonets" klubu ilə səfər heç-heçəsindən sonra başa çatıb – 0:0.
"Enfild"ə səfər ərəfəsində Hürzeler Yankuba Minte və Mats Vifferin sıraya qayıtmağa yaxın olduğunu bildirib. Ancaq onların qarşılaşmada iştirak edib-etməyəcəyi hələ məlum deyil. Paskal Struykinin meydana çıxması da sual altındadır.
"Liverpul" isə Andoni İraolanın rəhbərliyi altında tədricən formasını yaxşılaşdırır. Mersisayd təmsilçisi ötən tur səfərdə "Brentford"u 2:1 hesabı ilə məğlub edib. Çərşənbə axşamı isə UEFA Çempionlar Liqasında "Vilyarreal"la qarşılaşmada geridönüşə imza ataraq 4:3 hesablı qələbə qazanıb. Görüşün əvvəlində 0:2 hesabı ilə geri düşən komanda sonda üstünlüyü ələ keçirə bilib.
Komandanın hücum xəttində Aleksandr İsak və Florian Virts xüsusi rol oynayırlar. Çempionatda 5 qol vuran İsak "Liverpul"un əsas qol silahlarından biridir. Virts isə yaratdığı 20 qol epizodu ilə İPL-də bu göstərici üzrə liderdir.
Bununla belə, meydan sahiblərinin heyətində ciddi itkilər var. Dominik Soboslai, Jeremi Frimponq, Konor Bredli, Uqo Ekitike və Covanni Leoni zədələrinə görə qarşılaşmada iştirak edə bilməyəcəklər. Viktor Munyosun meydana çıxması sual altındadır. Bredli Barkola isə sağalıb və oynamağa hazırdır.
Maraqlı məqam ondan ibarətdir ki, İraola "Liverpul"un baş məşqçisi kimi çempionatda hələ doğma meydanda qələbə qazana bilməyib. "Brayton"la görüş bu uğursuz seriyanı dayandırmaq üçün yaxşı fürsətdir. Ancaq əla formada olan qonaqlar "Liverpul"un müdafiəsindəki problemlərdən yararlanmağa qadirdirlər.
İPL-in səkkizinci turunun oyun cədvəli
23 oktyabr, cümə
23:00 – "İpsviç" – "Nottingem Forest" – 1:1
24 oktyabr, şənbə
15:30 – "Aston Villa" – "Mançester Siti"
18:00 – "Arsenal" – "Everton"
18:00 – "Koventri" – "Fulhem"
20:30 – "Çelsi" – "Tottenhem"
25 oktyabr, bazar
18:00 – "Kristal Pelas" – "Nyukasl"
18:00 – "Hall Siti" – "Brentford"
18:00 – "Liverpul" – "Brayton"
18:00 – "Mançester Yunayted" – "Bornmut"
20:30 – "Sanderlend" – "Lids"
İPL-də turnir cədvəli
Yer Komanda Xal
1. "Mançester Siti" - 21 xal
2. "Arsenal" - 18 xal
3. "Brayton" - 16 xal
4. "Çelsi" - 13 xal
5. "Liverpul" - 12 xal
6. "Brentford" - 10 xal
7. "Lids" - 10 xal
8. "Everton" - 10 xal
9. "İpsviç" - 10 xal
10. "Hall Siti" - 9 xal
11. "Nyukasl" - 8 xal
12. "Aston Villa" - 8 xal
13. "Mançester Yunayted" - 7 xal
14. "Kristal Pelas" - 7 xal
15. "Bornmut" - 6 xal
16. "Tottenhem" - 6 xal
17. "Nottingem Forest" - 6 xal
18. "Koventri" - 6 xal
19. "Fulhem" - 5 xal
20. "Sanderlend" - 4 xal.
