Idman.biz
Futbol üzrə Azərbaycan çempionatında oyunlar zamanı 1 dəqiqəlik su fasiləsi tətbiq ediləcək.
İdman.Biz xəbər verir ki, bu barədə media nümayəndələri ilə görüşdə AFFA Hakimlər Komitəsinin sədri Rəhim Həsənov məlumat verib.
Həsənov bildirib ki, qaydalara əsasən, havanın temperaturu 32 dərəcəyə çatdıqda su fasiləsi tətbiq olunur.
Bununla belə, Bakıda avqust ayında havanın rütubətinin yüksək olduğunu nəzərə alaraq, fasilənin daha aşağı temperaturda da verilməsi mümkündür:
"Bilirsiniz ki, Bakıda avqust ayında havanın rütubəti yüksək olur. Bu səbəbdən AFFA nümayəndələri lüzum görərsə, futbolçuların sağlamlığını nəzərə alaraq, hətta 30 dərəcədə də su fasiləsi tətbiq edə bilərlər".
O qeyd edib ki, su fasiləsi 1 dəqiqə davam edəcək və onun tətbiq olunacağı barədə hər iki komandaya oyunöncəsi məlumat veriləcək.
Qeyd edək ki, bu gün AFFA-nın inzibati binasında AFFA Hakimlər Departamenti və Hakimlər Komitəsi tərəfindən futbolda Oyun Qaydaları və VAR Protokolunda edilmiş son dəyişikliklərlə bağlı media nümayəndələri üçün məlumatlandırıcı görüş keçirilib.
