Sport24.az
Cari mövsümdə "Zirə"nin heyətində özünü yaxşı tərəfdən göstərən futbolçulardan biri də Fuad bayramov oldu. İcarə əsasında "qartallar"ın şərəfini qoruyan 26 yaşlı müdafiəçi meydana çıxdığı 26 oyunda 2 qol və 1 məhsuldar ötürmə ilə yadda qaldı. Bayramovun icarə müddəti başa çatır. Görəsən, müdafiəçi növbəti mövsümdə hansı klubun şərəfini qoruyacaq? Sport24.az-a müsahibə verən futbolçu həm bu, həm də bizi maraqlandıran başqa sualları cavablandırdı.
- Premyer Liqada mövsüm başa çatıb. Çempionat barədə fikirlərini bölüşərdin...
- Başa çatan mövsüm yüksək rəqabət fonunda çox gərgin və maraqlı oldu. Bizim üçün hər oyun, hər qələbə, qazanılan hər bir xal böyük zəhmət bahasına başa gəldi. Şükürlər olsun ki, sonda istəiyimizə nail olduq, mükafatçılar sırasında yer aldıq. Buna da layiq idik.
- Premyer Liqanı 2-ci yerdə bitirsəz də, "futbol ili" sizin üçün başa çatmayıb. Qarşıda komandanı "Qarabağ"la kubokun finalı gözləyir. İlkə imza atmaq, titul qazanmaq şansınız var...
- Artıq çempionatdakı uğurumuzu yaddan çıxarıb, kubokun final matçına səfərbər olmuşuq. "Qarabağ"ın gücü və səviyyəsi barədə əlavə nəsə deməyə ehtiyac yoxdu. Amma rəqibdən çəkinmirik, biz də onlar kimi kuboku başımız üzərinə qaldırmağa köklənmişik. Azarkeşlərimiz bilsinlər ki, son saniyələrə kimi mübarizə aparacağıq.
- Özün Şamaxıdansan. Doğma yurdunun komandası da növbəti mövsüm elitada çıxış edəcək.
- "Zirə" də çıxış etsəm də, ürəyim "Şamaxı"yla da döyünür. "Şirlər"in yenidən Premyer Liqada çıxış edəcəyinə sevinirəm.
- Müqavilə ilə də "Şamaxı"ya məxsussan. "Zirə"dəki icarə müddətin bitir. Gələcəyini harda görürsən?
- Bu barədə hələlik nəsə deyə bilmərəm. Hazırda bütün fikirimi kubokun final matçına kökləmişəm.
- Atan çılğın futbol azarkeşidi. Onu tez-tez "Zirə"nin və "Şamaxı"nın oyunlarında görmək mümkündü. Hansı kluba daha çox azarkeşlik edir? "Şamaxı"ya, yoxsa "Zirəyə"?
- Uşaqlıqdan mənə ən böyük dəstək verən və heç vaxt tək buraxmayan atam olub. O, yalnız atam yox, həm də bir nömrəli azarkeşimdi. Atama buna görə çox minnətdaram. O ki qaldı bu suala, yaxşı olardı ki, bunu özündən soruşun.
ABDULLA İSMAYILOĞLU
