"Bu gün "Neftçi" PFK-nın baş icraçı direktoru vəzifəsində sonuncu günümdür. Klub ilə qarşılıqlı razılıq əsasında yollarımızı ayırdıq".
İdman.biz xəbər verir ki, bu fikirləri baş icraçı direktoru Fərrux Mahmudova məxsusdur.
Postundan istefa verən klub rəsmisi sosial şəbəkə paylaşımında Bakı təmsilçisindəki bir illik fəaliyyətini dəyərləndirib: "Bu şərəfli, eyni zamanda məsuliyyətli yolun bir parçası olmaqdan qürur duyuram. Bu müddət ərzində qarşıya qoyulan məqsədlərin hamısını reallaşdıra bilməsək də, əsaslı və perspektivli işlərə imza atdıq. Göz qabağında olmayan bu işlərlə böyük bir dövrün, böyük bir dəyişikliyin təməlini qoyduq".
O, fəaliyyəti dövründə avrokuboklara vəsiqə və Premyer Liqada mükafat qazana bilməyən "ağ-qaralar"a uğurlar arzulayıb: "Hər kəsə - komanda yoldaşlarıma, futbolçulara, həmkarlara, azarkeşlərə təşəkkürümü bildirir, "Neftçi"yə uğurlar, layiq olduğu yerlər və parlaq nailiyyətlər arzu edirəm".
Qeyd edək ki, Mahmudova qədər baş məşqçi Miodraq Bojoviç də "Neftçi"dən ayrılıb. O, son mətbuat konfransında uğursuzluğun yeganə günahkarı olmadığını açıqlamaqla növbəti istefalara eyham vurub.
İdman.biz