Sport24.az
Gələn həftənin ilk iş günündə AFFA İcraiyyə Komitəsinin iclası keçiriləcək. Toplantıda yeni mövsüm üçün qərarlar qəbul olunacaq. Bura komanda sayının artmasından tutmuş, legioner limitinə kimi məsələlər aiddi. Toplantıdan öncə tanınmış menecer Erkin İbrahimov Sport24.az-a müsahibə verib. Erkin bəyin gündəmdə olan mövzularla bağlı öz fikiləri var ki, söhbət zamanı onları dilə gətirib.
- Artıq mövsümün başa çatmasına hesabat turu da daxil olmaqla 3 həftə qalıb. Mövsümün geri qalan hissəsini dəyərləndirməyinizi istərdik.
- "Qarabağ" dominantlıq etdiyi Premyer Liqada çempionluğunu erkən rəsmləşdirib, "Qəbələ"nin isə sonuncu olması dəqiqləşib. Buna baxmayaraq, maraqlı mövsümün şahidi oluruq. Avrokuboklar uğrunda mübarizə, həyəcan hələ də davam edir. 4 komanda hazırda qitəmiqyaslı yarışlara vəsiqə uğrunda döyüşür.
- Sizcə, Premyer Liqanın səviyyəsi yüksəlib, futbolumuzda inkişaf var?
- Ötən mövsüm idman prinsipi gözlənildi. Bunun nəticəsidi ki, komandalar arasında sonuncu olmamaq üçün gərgin mübarizə gedirdi. Fikrimcə, bu ənənəni mütləq qorumalıyıq. Əks təqdirdə gələn "futbol ili"ndə rəqabətli çempionat görməyəcəyik.
- Demək istəyirsiz ki, "Qəbələ" mütləq aşağı liqaya düşməlidi?
- İstər bu mövsüm, istərsə də gələn "futbol ili"ndə sonuncu olan komanda birmənalı olaraq elitanı tərk etməlidi.
- Bir klub gedib üçü gəlməlidi, yoxsa biri aşağı düşüb, əvəzinə biri yüksəlməlidi?
- Əsasnaməyə əməl olunmalıdı. Yəni, Premyer Liqanın sonuncusu getməli, I Liqanın çempionu güclülər dəstəsinə yüksəlməlidi. Komanda sayı artacaqsa, mütləq keyfiyyətə üstünlük verilməlidi. Yəni, bazası, infrastrukturu, pis-yaxşı sponsoru olan klublara elitaya gətirilməlidi. Yoxsa Naxçıvanı təmsil edən "Araz-Naxçıvan" kimi gəlib Bakıda məskunlaşacaq komandalar olacaqsa, bunun heç bir faydası yoxdu. Odur ki, yalnız kəmiyyətin yox, keyfiyyətli kəmiyyətin olmasının tərəfdarıyam. Bu mümkün olacaqsa, 3 yox, 5 komandanın da gəlməsi mümkündü.
- Siz dünyanı gəzən və əksər ölkələrin futbol çempionatlarını yaxından izləyən menecerlərimizdənsiz. Biz idman prinsiplərini gözləməklə yıxılıb-qalxmağı nə vaxt bacaracağıq?
- İdman prinsiplərinin qorunmasında hamı maraqlı olmalıdı. Reqlament varsa, ona əməl olunmalıdı. Reqlamentə müqəddəs kitab kimi yanaşmalı, "tez-tez dəyişiklər etmək olmaz" anlayışını beynimizə yeritməliyik. Bu işdə hamı maraqlı olmasa, nə yıxılıb-qalxmağı öyrənəcək, nə inkişaf edəcəyik.
- Necə düşünürsüz mövsüm bitəndən sonra ölkə xaricinə yollanan futbolçularımız çox olacaq?
- Bu tətbiq olunacaq legioner limitindən asılıdı. Eşitdiyimə görə, gələn mövsümdə "8+3" limiti tətbiq olunacaq. Belə olsa,məncə, legioner həyatı yaşamaq istəyənlər çox olacaq. Nə qədər gülünc səslənsə də, bizdə futbolçunu qovmasaq və ya burda məhdudiyyət tətbiq etməsək o, legioner həyatı yaşamaq üçün addımlar atmır.
- Bu mövsüm 6 futbolçumuz ölkə xaricinə yollandı. Dediyiniz limit tətbiq olunsa, yayda təxminən neçə futbolçunun legioner həyatı yaşaması gözlənilir?
- Düşünürəm ki, 10-11 nəfər ölkə xaricinə yollanacaq.
- Sizcə, futbolçularımız əsas hansı ölkələrə üz tuta bilər?
- Kimin bacarığı, səviyyəsi nədirsə, özünə uyğun çempionata gedəcək. Türkiyədən tutmuş Latviyaya klublarına qədər oyunçularımızı görəcəyik.
- Musa Qurbanlı İsveçdə özünü doğrultmadı, onun yenidən Premyer Liqaya qayıtması gündəmdədi. Bu barədə nə deyərdiz?
- Musanın çempionatımıza qayıtması faciə deyil. O, hələ gəncdi, görünür getdiyi ölkənin həyat tərzinə və futbol səviyyəsinə uyğun gəlmədi. Musaya hazırda daimi oynayacaq komanda lazımdı. Çempionatımızla yanaşı, çempionatı bir qədər zəif olan Avropa ölkəsində icarəyə yollanması pis olmaz. Həyatda olduğu kimi, futbol karyeranda da bəzən bir addım geri atmaq məcburiyyətində qalırsan. İstənilən halda pessimizmə qapılmaq və mənfi tonlara köklənməyə tələsməyək. Zaman hər şeyi göstərəcək.
ABDULLA İSMAYILOĞLU
