Elmar Baxşıyev: “Söz sahibi mən olmalıyam”

"Qarabağ" ı çempionluq münasibəti ilə təbrik edir, klublarımıza Avropada uğurlu çıxış arzulayıram".

İdman.biz xəbər verir ki, bunu "Araz-Naxçıvan"ın baş məşqçisi Elmar Baxşıyev Premyer Liqanın XXXVI turunda "Qarabağ"la (2:2) oyundan sonra keçirilən mətbuat konfransında deyib.

- Mətbuatda "Araz Naxçıvan"dan gedəcəyinizlə bağlı yazılar dərc olunur. Bu gün "Qarabağ"la heç-heçə bütün bunlara cavab oldu?

- Buraya gələndə tələbim o idi ki, iki ay müqavilə bağlayaq. Çünki komandadakı vəziyyəti görmək istəyirdim. Düzü, rəhbərlik bir ildən artıq müqavilə imzalanmasını istəyirdi. Mətbuat məni göndərməyə çalışır. Amma rəhbərliyin sözü önəmlidir.

- ⁠Komanda ilə davam etmək fikriniz var?

- ⁠Mənim də öz tələblərim var. Daha iddialı komanda görmək istəyirəm. Əgər istəklərim nəzərə alınsa klub mənim üçün uyğundur. "Qəbələ"də olduğu kimi burada da söz sahibi mən olmalıyam. Hər şey klub rəhbərliyi ilə görüşdən asılıdır.

- "Qəbələ"nin Premyer Liqadan getməsini necə qarşıladınız?

- Çox məyus oldum. Futbol göstərir ki, hər şeyin qədirini bilmək və oyunçuları komndada saxlamaq önəmlidir. Riskə getdik və alınmadı. "Qəbələ" köklü klubdur, yaxşı rəhbərliyi var. İnanıram ki, yenidən Premyer Liqaya dönəcəklər.

- ⁠"Araz Naxçıvan"nın Avrokuboklarda mübarizə apara bilməməsi üçün nə çatışmır?

- ⁠İlk dövrələr göstərdi ki, komanda yaxşı futbol nümayiş etdirmək qabliyyətindədir. Lakin ehtiyat qüvvə yoxdur. Komplektləmiş heyətə ehtiyac var. Belə olduğu halda rotosiyalara qarşı gələ bilərik.

İdman.biz