Idman.biz
Ekvador futbolunun ən titullu klublarından biri olan "El Nasional" ağır maliyyə vəziyyətindən çıxmaq üçün formasındakı reklam yerlərini azarkeşlərə və şirkətlərə satmağa başlayıb.
İdman.Biz xəbər verir ki, Kito təmsilçisi yeni xatirə formasında istənilən şəxsin öz adını, şirkət və ya brend loqosunu yerləşdirməsinə imkan yaradıb. Klub bu kampaniyanı Perunun "Deportivo Municipal" komandasının oxşar təşəbbüsündən ilhamlanaraq həyata keçirir.
Formanın qollarında və arxa hissəsində yer almaq 250 ABŞ dollarına (425 AZN), ön hissəsində reklam yerləşdirmək isə 500 ABŞ dollarına (850 AZN) başa gəlir. Kampaniyaya həm azarkeşlər, həm sahibkarlar, həm də müxtəlif şirkətlər qoşula bilər.
Bu addım klubun üzləşdiyi ciddi maliyyə böhranı fonunda atılıb. 13 dəfə Ekvador çempionu olan "El Nasional" ötən mövsüm yüksək liqadan aşağı düşüb və hazırda maliyyə problemləri ilə mübarizə aparır. Klub tarixində Libertadores Kubokunun yarımfinalına qədər də irəliləyib.
Kampaniyanın əsas məqsədi azarkeşlərin və biznes nümayəndələrinin birgə dəstəyi hesabına kluba əlavə gəlir qazandırmaqdır. "El Nasional" bu təşəbbüsü kollektiv dəstək və klubun gələcəyinin qorunması ideyası üzərində qurub.
