Idman.biz
İtaliyanın "Milan" klubunun qapıçısı Mayk Menyanın adı yenidən İngiltərənin "Çelsi" klubunun transfer planlarında yer alıb. London təmsilçisi yayda uğursuz alınan cəhddən sonra fransalı qolkiper üçün marağını bərpa etməyə hazırlaşır.
İdman.Biz "La Gazzetta dello Sport"a istinadla xəbər verir ki, "Çelsi" hazırda qapıçı mövqeyi üzrə variantları qiymətləndirir və Menyan "Milan"da dəyişməz əsas qapıçı statusunu qorumaqdadır. Lakin 30 yaşlı futbolçunun 2026-cı ilin iyununa qədər qüvvədə olan müqaviləsi onun gələcəyi ilə bağlı qeyri-müəyyənlik yaradır.
"Milan" rəhbərliyi Canluici Donnarummanın vaxtilə klubu azad agent kimi tərk etməsi ssenarisinin təkrarlanmasını istəmir.
Mənbə qeyd edir ki, tərəflər arasında müqavilənin uzadılması ilə bağlı danışıqlar gərgin keçib. İlkin müzakirələr müsbət nəticə verməyib və "Milan" Menyanın mövsümə 5 milyon avro (təxminən 9,25 milyon AZN) maaş tələbinə razılıq verməyib. Buna baxmayaraq, "rossoneri" qolkiperlə uzunmüddətli yeni müqavilə imzalamaqda qərarlıdır.
Razılaşmanın hələlik əldə olunmaması fonunda "Milan" alternativ planlar üzərində də işləyir və Menyan başqa kluba keçmək qərarı verərsə, mümkün əvəzediciləri izləməyə başlayıb. Əsas variant kimi braziliyalı qapıçı Alisson Bekkerin olduğu bildirilir.
