Idman.biz
Bədən dili üzrə tanınmış ekspertin fikrincə, Məhəmməd Salahın "Brayton"a qarşı "Enfild"də baş tutan emosional dönüşü onun "Liverpul" forması ilə son oyunu ola bilər.
İdman.Biz xəbər verir ki, bu barədə goal.com-da nəşr edilən yazıda qeyd olunur.
Mütəxəssis qeyd edir ki, tribunalından gələn isti qarşılanmaya baxmayaraq, oyundan sonrakı davranışlar misirli futbolçunun klubla vidalaşdığını göstərir.
Salah şənbə günü Premyer Liqa çərçivəsində "Brayton"a qarşı qazanılan qələbədə "Liverpul"un heyətinə qayıdıb. Onun gələcəyi ilə bağlı qeyri-müəyyənlik fonunda keçirilən bu görüş böyük diqqət mərkəzində olub. Daxili danışıqlardan sonra heyətə qaytarılan vinger matçda iştirak edib və qələbədə pay sahibi olub. Lakin əsas diqqət final fitindən sonra yaşananlara yönəlib.
Oyun başa çatdıqdan sonra Salah meydanı tələsmədən dövrə vuraraq azarkeşləri alqışlayıb. "Enfild" tribunalarında onun adının səsləndirilməsi fonunda azarkeşlər uzun sürən alqışlarla cavab veriblər. Tribunalarda Salahın "Liverpul"dakı uğurlarını əks etdirən bannerlər də yer alıb. Bu mənzərə son həftələrdə yaşanan oyun forması ilə bağlı tənqidlər və meydandan kənar gərginlik fonunda xüsusilə diqqət çəkib.
Salahın yaxın vaxtlarda Afrika Millətlər Kuboku üçün Misir yığmasının düşərgəsinə yollanacağı nəzərə alınsa, "Brayton"la matç daha da simvolik məna qazanıb. Emosional anlar və onların zamanlaması "Liverpul" azarkeşlərinin klub tarixinin ən böyük futbolçularından birinin son səhifəsinə şahidlik edib-etmədiyi ilə bağlı geniş müzakirələrə səbəb olub.
Ekspert: "Bu, Salahın Liverpulla vidası idi"
Böyük Britaniyada tanınmış bədən dili üzrə analitik Darren Stenton açıqlamasında Salahın davranışlarını belə şərh edib:
"Bəli, açıq şəkildə demək olar ki, Məhəmməd Salah ‘Brayton"la oyundan sonra çox emosional idi. Məncə, bu, demək olar ki, onun epitafiyası idi. Açığı, onu bir daha görəcəyimizi düşünmürəm".
Stenton fikrini davam etdirərək bildirib: "Bəli, tribunaları alqışlayarkən gözlərində yaş var idi. Məncə, bu onun son akkordu, yəni vidası idi. Rəsmi olmasa da, düşünürəm ki, o, ürəyində anlayır ki, bir daha bu meydana çıxmayacaq".
Analitik Salahın mimikasına da diqqət çəkib: "Salahın üz ifadəsində kədər və məyusluq var idi. Hadisələrin başqa cür cərəyan etməməsindən dolayı dərin üzüntü hiss olunurdu. O, olduqca emosional idi, gözləri yaşarmışdı və üzündə kədəri əks etdirən mikroifadələr açıq şəkildə sezilirdi".
