Azərbaycan millisi Andorra ilə keçirdiyi beynəlxalq yoldaşlıq görüşünü 3:1 hesablı qələbə ilə başa vurub.
Lakin qarşılaşmadan sonra Bədavi Hüseynovun oyunun iştirak ərizəsində adı olmadığı halda meydana daxil olması səbəbindən millimizin texniki məğlubiyyət ala biləcəyi ilə bağlı xəbərlər yayılıb.
İdman.Biz-in məsələ ilə bağlı sorğusuna cavab olaraq AFFA-nın mətbuat katibi Aida Əliyeva yayılan məlumatlara aydınlıq gətirib.
O bildirib ki, Bədavi Hüseynovun adı UEFA-nın rəsmi platformasında yayımlanan Andorra – Azərbaycan oyununun protokolunda yer alıb.
Aida Əliyevanın sözlərinə görə, AFFA-ya qarşılaşma ilə bağlı hər hansı qayda pozuntusu və ya texniki məğlubiyyət ehtimalı barədə rəsmi müraciət daxil olmayıb.
Qurum rəsmisi təəssüflə qeyd edib ki, bu cür xəbərlər AFFA ilə dəqiqləşdirilmədən, qurumun mövqeyi öyrənilmədən ictimaiyyətə təqdim olunur.